ഗൂഗിളിന്റെ ഇപ്പോഴുള്ള സൗകര്യങ്ങള്‍ തന്നെ ആളുകള്‍ ഉപയോഗിച്ചിട്ടുണ്ടാവില്ല. എങ്കിലും ഭാവിയെ കൈപ്പിടിയിലൊതുക്കി ഉപയോക്താക്കള്‍ക്കായി അവതരിപ്പിച്ചിരിക്കുകയാണ് സെര്‍ച്ച് എന്‍ജിന്‍ ഭീമന്‍ ഗൂഗിള്‍. ആര്‍ട്ടിഫിഷ്യന്‍ ഇന്റലിജന്റായിരിക്കും ഭാവി ഡിവൈസുകള്‍ കീഴടക്കുകയെന്നു തെളിയിക്കുന്നതായിരുന്നു ഗൂഗിളിന്റെ ഓരോ പുതിയ പ്രഖ്യാപനവും. ഗൂഗിള്‍ മേധാവി സുന്ദര്‍ പിച്ചൈയുടെ വാക്കുകളിലും ഇതു മുഴച്ചുനില്‍ക്കുന്നുണ്ടായിരുന്നു.

ഇനി ലോകം കാണും ഗൂഗിള്‍ ലെന്‍സിലൂടെ...

പുതുതായി പ്രഖ്യാപിച്ച പ്രധാനപ്പെട്ടൊരു സാങ്കേതിക വിദ്യയാണ് ഗൂഗിള്‍ ലെന്‍സ്. ഭാവിയില്‍ ഗൂഗിള്‍ ലെന്‍സിലൂടെയായിരിക്കും ലോകത്തെ കാണുകയെന്ന് ടെക് ലോകം വിലയിരുത്തുന്നു. ഗൂഗിള്‍ ലെന്‍സിനെപ്പറ്റി അറിഞ്ഞാല്‍ നിങ്ങള്‍ക്കുമതു ബോധ്യമാവും.

അതായത് ഒരു ചിത്രം കാണിച്ച് ഇതെന്താണെന്നു ചോദിച്ചാല്‍ അതേപ്പറ്റി പറഞ്ഞുതരുന്ന സഹായിയായാണ് ഗൂഗിള്‍ ലെന്‍സിനെ അവതരിപ്പിച്ചിരിക്കുന്നത്. ഉദാഹരണത്തിന്, പൂവിനു മുമ്പില്‍ ഫോണ്‍ പിടിച്ചാല്‍ അതു സ്‌കാന്‍ ചെയ്യുകയും പൂവിന്റെ പേരും മറ്റു വിവരങ്ങളും നല്‍കുകയും ചെയ്യും.

ഒരു സ്ഥലത്തെത്തിയാല്‍ അവിടുത്തെ ഹോട്ടലുകളെപ്പറ്റിയും മറ്റുമുള്ള എല്ലാ വിവരങ്ങളും ഞൊടിയിടയില്‍ ലഭ്യമാവും. എന്തിനേറെ, ഫോണ്‍ വൈഫൈ ഡിവൈസുമായി കണക്റ്റ് ചെയ്യാന്‍ റാഡറിലുള്ള യൂസര്‍ നെയിമിലും പാസ്‌വേഡിലും സ്‌കാന്‍ ചെയ്താല്‍ മാത്രം മതി, ബാക്കി ഗൂഗിള്‍ ചെയ്‌തോളും. അതായത് നമ്മളുടെ എന്തു സഹായത്തിനും ഗൂഗിള്‍ തയ്യാറായി നിന്നിട്ടുണ്ടാവും.