ലണ്ടന്‍: സീസണ്‍ തുടക്കത്തില്‍ തന്നെ മികച്ച ജയവുമായി ആഴ്‌സനല്‍. കഴിഞ്ഞ ദിവസം നടന്ന യൂറോപ്പാ ലീഗ് മത്സരത്തിലാണ് ആഴ്‌സനല്‍ ജയത്തോടെ തുടങ്ങിയത്. 4-2 എന്ന സ്‌കോറിന് വോസ്‌ക്ലയെയാണ് ആഴ്‌സനല്‍ പരാജയപ്പെടുത്തിയത്. 32, 56 മിനുട്ടുകളില്‍ ഒബമയോങ് ഇരട്ട ഗോളുകള്‍ സ്വന്തമാക്കി. 48-ാം മിനുട്ടില്‍ ഡാനി വെല്‍ബാക്ക്, 74-ാം മിനുട്ടില്‍ മെസുട്ട് ഓസില്‍ എന്നിവരും ആഴ്‌സനലിനായി ലക്ഷ്യം കണ്ടു.
വോസ്‌ക്ലെക്ക് വേണ്ടി വ്‌ളാഡിമര്‍ ചെസ്‌നാക്കോവ്, ഷാര്‍പ്പര്‍ എന്നിവര്‍ ഗോളുകള്‍ സ്വന്തമാക്കി. മറ്റൊരു മത്സരത്തില്‍ ഗ്രീക്ക് ക്ലബായ പി. എ. ഒ.കെയെ എതിരില്ലാത്ത ഒരു ഗോളിന് ചെല്‍സി പരാജയപ്പെടുത്തി. 7-ാം മിനുട്ടില്‍ വിലന്യനാണ് ഗോള്‍ നേടിയത്. ഒന്നിനെതിരേ അഞ്ചു ഗോളുകള്‍ക്ക് സ്പാനിഷ് ക്ലബായ സെവിയ്യ സ്റ്റാന്‍ഡേര്‍ഡ് ലീഗിനെ തോല്‍പ്പിച്ചു. അര്‍ജന്റീനന്‍ താരം എവര്‍ ബനേഗ 8, 74 മിനുട്ടുകളില്‍ സെവിയ്യക്കായി സ്‌കോര്‍ ചെയ്തു. ഫ്രാങ്കോ വസ്‌കസ്, ബിസാം ബിന്‍ യാദര്‍ എന്നിവരും സെവിക്കായി ലക്ഷ്യം കണ്ടു. സ്റ്റാന്‍ഡേര്‍ഡിനായി മൂസാ ഡെനെപ്പോയാണ് ആശ്വാസ ഗോള്‍ നേടിയത്. ടര്‍ക്കിഷ് ക്ലബായ ബെസിക്ടസ് ഒന്നിനെതിരേ മൂന്ന് ഗോളുകള്‍ക്ക് സാര്‍പ്‌സ് ബര്‍ഗിനെ പരാജയപ്പെടുത്തി. ഫ്രഞ്ച് ക്ലബായ റെന്നസ് 2-1 എന്ന സ്‌കോറിന് ജബ്ലോണക്കിനെയും പരാജയപ്പെടുത്തി. ഇംഗ്ലീഷ് ക്ലബായ ഡ്യൂഡലങ്ങിനെ എതിരില്ലാത്ത ഒരു ഗോളിന് എ.സി മിലാന്‍ പരാജയപ്പെടുത്തി. 59-ാം മിനുട്ടില്‍ അര്‍ജന്റീനന്‍ താരം ഗോണ്‍സാലോ ഹിഗ്വെയിനാണ് മിലാന് വേണ്ടി ഗോള്‍ നേടിയത്.