തിരുവനന്തപുരം: ജോസഫും ജോസും അവകാശവാദം ഉന്നയിച്ചതോടെ കേരള കോണ്‍ഗ്രസ് എമ്മിന്റെ രണ്ടില ചിഹ്നം മരവിപ്പിച്ച് സംസ്ഥാന തെരഞ്ഞെടുപ്പ് കമ്മീഷണറുടെ ഉത്തരവ്. തദ്ദേശ തിരഞ്ഞെടുപ്പില്‍ മാത്രമായിരിക്കും നടപടി. രണ്ടില ചിഹ്നം മരവിപ്പിക്കാന്‍ തെരഞ്ഞെടുപ്പ് കമ്മിഷണര്‍ വി.ഭാസ്‌കരനാണ് തീരുമാനിച്ചത്. രണ്ടില ചിഹ്നം ജോസ് കെ മാണിക്ക് നല്‍കാന്‍ കേന്ദ്ര തെരഞ്ഞെടുപ്പ് കമ്മിഷന്‍ തീരുമാനിച്ചെങ്കിലും ഈ വിധിയെ ചോദ്യം ചെയ്ത് ജോസഫ് ഹൈക്കോടതിയെ സമീപിക്കുകയായിരുന്നു.

രണ്ടില ചിഹ്നത്തില്‍ ഹൈക്കോടതിയിലെ കേസുകളിലെ വിധിക്ക് വിധേയമായി മാത്രമേ ചിഹ്നം അനുവദിക്കാന്‍ സാധിക്കൂവെന്ന് തെരഞ്ഞെടുപ്പ് കമ്മിഷണര്‍ വ്യക്തമാക്കി. ചിഹ്നം മരവിപ്പിച്ച സാഹചര്യത്തില്‍ ജോസഫ് വിഭാഗത്തിനും ജോസ് വിഭാഗത്തിനും അവര്‍ ആവശ്യപ്പെട്ട പ്രകാരം ചെണ്ടയും ടേബിള്‍ ഫാനും അനുവദിച്ചതെന്ന് തെരഞ്ഞെടുപ്പ് കമ്മിഷണര്‍ വാര്‍ത്താക്കുറിപ്പില്‍ അറിയിച്ചു. ജോസ് കെ.മാണിക്ക് ടാബിള്‍ ഫാനും  ജോസഫിന് ചെണ്ടയുമായിരിക്കും.