ദുബൈ: നഗരത്തില്‍ ഭിക്ഷാടന വിരുദ്ധ ക്യാമ്പയിന്‍ ശക്തമാക്കുന്നതിനിടെ 20,000 ദിര്‍ഹവുമായി (ഏകദേശം അഞ്ചുലക്ഷം രൂപ) യാചകന്‍ ദുബൈ പൊലീസിന്റെ പിടിയിലായി. സംശയാസ്പദമായ വ്യക്തികളെയും ക്രിമിനല്‍ പ്രതിഭാസങ്ങളെയും തടയുന്നതിനുള്ള വിഭാഗമാണ് പൊതു പാര്‍ക്കിംഗില്‍ നിന്ന് ഇയാളെ പിടികൂടിയത്. നഗരത്തിന്റെ പ്രതിച്ഛായയെ ബാധിക്കുന്നതും വഞ്ചനാപരമായ രീതിയില്‍ പണം തട്ടുന്നതുമായ ഭിക്ഷാടനത്തിനെതിരെ വിവിധ വകുപ്പുകളുമായി ചേര്‍ന്നാണ് 'കോംബാറ്റിംഗ് ബെഗ്ഗിംഗ്' എന്ന പേരില്‍ ദുബൈ പൊലീസ് പ്രത്യേക പരിശോധന നടത്തുന്നത്.
പാര്‍ക്കിംഗുകളിലും ട്രാഫിക് സിഗ്‌നലുകളിലും എത്തുന്ന ആഡംബര വാഹന ഉടമകളെയാണ് ഇയാള്‍ പ്രധാനമായും ലക്ഷ്യം വെച്ചിരുന്നതെന്ന് സസ്പിഷ്യസ് പേഴ്‌സണ്‍സ് ആന്‍ഡ് ക്രിമിനല്‍ ഫിനോമിന ഡിപ്പാര്‍ട്ട്‌മെന്റ് ഡയറക്ടര്‍ ബ്രിഗേഡിയര്‍ അലി സലേം അല്‍ ഷംസി പറഞ്ഞു. ദാരിദ്ര്യത്തിന്റെയും പട്ടിണിയുടെയും വ്യാജ കഥകള്‍ നിരത്തിയാണ് ഇയാള്‍ വാഹന ഉടമകളില്‍ നിന്ന് പണം തട്ടിയെടുത്തിരുന്നത്.
പള്ളികള്‍, ക്ലിനിക്കുകള്‍, ആശുപത്രികള്‍, മാര്‍ക്കറ്റുകള്‍ എന്നിവിടങ്ങളില്‍ വ്യാജ കഥകള്‍ പറഞ്ഞ് ജനങ്ങളുടെ സഹതാപം മുതലെടുക്കുന്ന സംഘങ്ങള്‍ക്കെതിരെ പൊതുജനങ്ങള്‍ ജാഗ്രത പാലിക്കണം- ബ്രിഗേഡിയര്‍ അല്‍ ഷംസി വ്യക്തമാക്കി.

ഭിക്ഷാടനം ശിക്ഷാര്‍ഹം

ഫെഡറല്‍ നിയമപ്രകാരം ഭിക്ഷാടനം ശിക്ഷാര്‍ഹമായ കുറ്റമാണ്. സഹായം ആവശ്യമുള്ള അര്‍ഹരായ വ്യക്തികള്‍ ഔദ്യോഗികമായി രജിസ്റ്റര്‍ ചെയ്ത ജീവകാരുണ്യ സംഘടനകളെയാണ് സമീപിക്കേണ്ടതെന്ന് അധികൃതര്‍ ഓര്‍മ്മിപ്പിച്ചു. യാചകര്‍ക്ക് പണം നല്‍കി അവരെ പ്രോത്സാഹിപ്പിക്കരുതെന്നും, ഇത്തരം നിയമലംഘനങ്ങള്‍ ശ്രദ്ധയില്‍പ്പെട്ടാല്‍ ഉടന്‍ തന്നെ പൊലീസിനെ അറിയിക്കണമെന്നും ജനറല്‍ ഡിപ്പാര്‍ട്ട്‌മെന്റ് ഓഫ് ക്രിമിനല്‍ ഇന്‍വെസ്റ്റിഗേഷന്‍ അഭ്യര്‍ത്ഥിച്ചു.

റിപ്പോര്‍ട്ട് ചെയ്യാനുള്ള വഴികള്‍:

ദുബൈ പൊലീസ് സ്മാര്‍ട്ട് ആപ്പിലെ 'Police Eye' സേവനം.

901 എന്ന നമ്പറില്‍ വിളിക്കുക.

ALSO READ: യു.എസിന്റെ മുന്‍കരുതല്‍ നടപടി; ഇറാനുമായുള്ള സംഘര്‍ഷത്തിനിടെ ഖത്തറില്‍നിന്നും ബഹ്‌റൈനില്‍നിന്നും സൈന്യത്തെ ഒഴിപ്പിച്ചു

 Police have arrested a beggar found in possession of Dh20,000 in cash during a targeted crackdown on illicit solicitation. The individual was apprehended in a public car park as part of the ongoing 'Combating Begging' campaign. According to Brigadier Ali Salem Al Shamsi, the suspect specifically targeted owners of luxury vehicles at car parks and traffic signals using fabricated stories of extreme poverty.