ന്യൂഡല്‍ഹി: ആഭ്യന്തരമന്ത്രി അമിത് ഷാ രണ്ട് ദിവസത്തെ ജമ്മു കശ്മിര്‍ സന്ദര്‍ശനത്തിനായി ഇന്ന് ശ്രിനഗറില്‍ എത്തും. സംസ്ഥാനത്തെ സുരക്ഷാ സാഹചര്യങ്ങളും അമര്‍നാഥ് യാത്രയുടെ സുരക്ഷാ ക്രമീകരണങ്ങളും അവലോകനം ചെയ്യുന്നതിനായാണ് സന്ദര്‍ശനം.

അധികാരമേറ്റത്തിനുശേഷം ആഭ്യന്തരമന്ത്രിയുടെ ആദ്യ സംസ്ഥാന സന്ദര്‍ശനമാണിത്.
രണ്ട് ദിവസം നീളുന്ന സന്ദര്‍ശനത്തില്‍ ഗവര്‍ണര്‍ സത്യപാല്‍ മാലിക്കുമായി കൂടിക്കാഴ്ച നടത്തും. സംസ്ഥാനത്തെ നിലവിലുള്ള സുരക്ഷാ സാഹചര്യത്തെ കുറിച്ച് ചര്‍ച്ച നടത്തും.

മുന്‍ക്കൂട്ടി നിശ്ചയിച്ചതു പ്രകാരം, ഇന്ന് അമര്‍നാഥ് യാത്രയുടെ സുരക്ഷാ ക്രമീകരണങ്ങളും സംസ്ഥാനത്തെ വികസന പ്രവര്‍ത്തനങ്ങളും അവലോകനം ചെയ്യും. വൈകീട്ട് ബി.ജെ.പി പ്രവര്‍ത്തകരായും ചില ഭാരവാഹികളായും മറ്റു പ്രതിനിധി സംഘങ്ങളായും കൂടിക്കാഴ്ച നടത്തും.

ഈ രണ്ട് ദിവസങ്ങളിലും തീവ്രവാദി ആക്രമണങ്ങളാല്‍ മരണപ്പെട്ട ബി.ജെ.പി പ്രവര്‍ത്തകരുടെ കുടുംബങ്ങളെ സന്ദര്‍ശിക്കും.

നാളെ മേഖലയിലെ മൊത്തത്തിലുള്ള സുരക്ഷാ സാഹചര്യത്തെ കുറിച്ച് പരിശോധിച്ച ശേഷം ബന്ധപ്പെട്ട ഭാരവാഹികളുമായി ചര്‍ച്ച നടത്തും. ഉച്ചയ്ക്ക് ശേഷം അദ്ദേഹം ശ്രിനഗറില്‍ നിന്ന് യാത്രതിരിക്കും.
ഒന്നരമാസം നീണ്ടുനില്‍ക്കുന്ന വാര്‍ഷിക അമര്‍നാഥ് യാത്ര ജൂലൈ ഒന്നിന് ആരംഭിക്കും.