റിയാദ്: ഇറാന്‍ ആണവായുധം വികസിപ്പിക്കാനുള്ള ശ്രമം ഉപേക്ഷിക്കുന്നില്ലെങ്കില്‍ സഊദി സേനയ്ക്കും ആണവായുധം സ്വന്തമാക്കാന്‍ അവകാശമുണ്ടെന്ന് വിദേശകാര്യ സഹമന്ത്രി. തീര്‍ച്ചയായും ഇതൊരു മാര്‍ഗമാണ്, ഇറാന്‍ ആണവശക്തിയാവുകയാണെങ്കില്‍. കൂടുതല്‍ രാജ്യങ്ങള്‍ ഈ രംഗത്തേക്ക് എത്തുമെന്നും മന്ത്രി ആദില്‍ അല്‍ ജുബൈര്‍ ഒരു അഭിമുഖത്തില്‍ പറഞ്ഞു.
സ്വന്തം ജനതയെയും ഭൂഭാഗങ്ങളും സംരക്ഷിക്കാന്‍ സഊദി സാധ്യമായതെല്ലാം ചെയ്യുമെന്നും അദ്ദേഹം കൂട്ടിച്ചേര്‍ത്തു. ഇറാന്‍ ആണവായുധവും ബാലിസ്റ്റിക് മിസൈലും വികസിപ്പിക്കുന്നത് തടയാന്‍ ലോകരാജ്യങ്ങള്‍ ശക്തമായ നടപടി സ്വീകരിക്കണമെന്ന് കഴിഞ്ഞയാഴ്ച സഊദിയിലെ സല്‍മാന്‍ രാജാവ് ആവശ്യപ്പെട്ടിരുന്നു. എന്നാല്‍ ഇത്തരം അടിസ്ഥാനമില്ലാത്തതും യുദ്ധക്കൊതി പ്രകടിപ്പിക്കുന്നതുമായ പ്രസ്താവനകള്‍ ഒഴിവാക്കണമെന്നായിരുന്നു ഇറാന്റെ പ്രതികരണം.