വാഷിങ്ടണ്‍: മൂന്ന് വയസുകാരിയായ ഷെരിന്‍ മാത്യൂസിനെ കൊലപ്പെടുത്തിയ കേസില്‍ വളര്‍ത്തുപിതാവ് വെസ്‌ലി മാത്യൂസ് കുറ്റം സമ്മതിച്ചു. ശിക്ഷ കുറഞ്ഞുകിട്ടാനുള്ള നടപടിയായിട്ടാണ് ഡല്ലാസ് കോടതിയില്‍ വിചാരണ നടക്കുന്നതിനിടെ അദ്ദേഹം കുറ്റം സമ്മതിച്ചത്.

വളര്‍ത്തു പിതാവിനെതിരേ 2017ല്‍ യു.എസില്‍ കൊലക്കുറ്റം ചുമത്തിയിരുന്നു. മാത്യൂസ് കുറ്റക്കാരനാണെന്ന് തെളിഞ്ഞാല്‍ പരോളില്ലാതെ ജീവപര്യന്തം തടവിന് വിധിക്കും.
മലയാളികളായ വെസ്‌ലി മാത്യൂസും ഭാര്യ സിന മാത്യൂസും 2016ല്‍ ബിഹാറിലെ അഗതി മന്ദരിത്തില്‍നിന്നാണ് ഷെരിനെ ദത്തെടുത്തത്. 2017 ഒക്ടോബറിലാണ് ഷെരിനെ വീടിനടുത്തുള്ള കലുങ്കിന്റെ അടിയില്‍ മരിച്ച നിലയില്‍ കണ്ടെത്തിയത്. അതിന്നിടെ ഷെറിന്‍ മാത്യൂസിന്റെ ആന്തരികാവയവങ്ങള്‍ പുഴുക്കള്‍ തിന്നു തീര്‍ത്തിരുന്നുവെന്ന് ഡോക്ടറുടെ മൊഴി നല്‍കി.
ഷെറിന്റെ മൃതദേഹം പോസ്റ്റ്‌മോര്‍ട്ടം ചെയ്ത ഡോക്ടര്‍ ജഡ്ജിയോടാണ് വെളിപ്പെടുത്തല്‍ നടത്തിയത്.
ദിവസങ്ങള്‍ കഴിഞ്ഞാണ് കുട്ടിയുടെ മൃതദേഹം കണ്ടെത്തിയതെന്നതു കൊണ്ട് തന്നെ അഴുകിയ നിലയിലായിരുന്നു. അതിനാല്‍ തന്നെ മരണ കാരണം എന്താണെന്ന് കൃത്യമായി മനസ്സിലാക്കാന്‍ സാധിച്ചില്ലെന്നും പോസ്റ്റ്‌മോര്‍ട്ടം ചെയ്ത ഡോക്ടര്‍ എലിസബത്ത് വെന്റൂറ പറഞ്ഞു.

'കൊല്ലപ്പെട്ട് രണ്ടാഴ്ചയ്ക്കു ശേഷം കലുങ്കിനടിയില്‍ നിന്നാണ് അഴുകിയ നിലയില്‍ ഷെറിന്‍ മാതൃൂസിന്റെ മൃതദേഹം കണ്ടെടുക്കുന്നത്. അപ്പോഴേക്കും ആന്തരികാവയവങ്ങള്‍ ഭൂരിഭാഗവും പുഴുക്കള്‍ തിന്നു തീര്‍ത്തിരുന്നു', ഡോ എലിസബത്ത് കോടതിയില്‍ പറഞ്ഞു.