മുക്കം: മലയോര മേഖലയിലെ ക്വാറി, ക്രഷര്‍ യൂനിറ്റുകളില്‍ കോഴിക്കോട് സബ് കലക്ടര്‍ വി. വിഘ്‌നേശ്വരിയുടെ നേതൃത്വത്തില്‍ പരിശോധന നടത്തി. ഉരുള്‍പൊട്ടല്‍ ഏറ്റവുമധികം ദുരിതം വിതച്ച കാരശ്ശേരി, കൂടരഞ്ഞി, കൊടിയത്തൂര്‍ പഞ്ചായത്തുകളിലാണ് സംഘം എത്തിയത്.
കൂടരഞ്ഞി പഞ്ചായത്തില്‍ ഉരുള്‍പൊട്ടല്‍ ഉണ്ടായതിന്റെ പശ്ചാത്തലത്തില്‍ പശ്ചിമഘട്ട മലനിരകളില്‍ വ്യാപകമായി നടക്കുന്ന അനധികൃത ഖനനം സംബന്ധിച്ച് കൂടരഞ്ഞി വില്ലേജ് ഓഫിസര്‍ ജില്ലാ കലക്ടര്‍ക്ക് റിപ്പോര്‍ട്ട് നല്‍കിയിരുന്നു. ഇതേ തുടര്‍ന്നാണ് സബ് കലക്ടര്‍, സി.ഡബ്ല്യു.ആര്‍.ഡി.എം പ്രതിനിധി, സോയില്‍ കണ്‍സര്‍വേറ്റര്‍, ഹൈഡ്രോ ജിയോളജിസ്റ്റ്, ജിയോളജിസ്റ്റ് എന്നിവരുടെ സംഘത്തെ കലക്ടര്‍ പരിശോധനക്കായി നിയമിച്ചത്.
ഇന്നലെ രാവിലെ പത്തോടെ എത്തിയ സംഘം മലയോര മേഖലയിലെ ഒട്ടുമിക്ക ക്വാറികളിലും പരിശോധന നടത്തി ഉച്ചയോടെയാണ് തിരിച്ചു പോയത്. അതേസമയം പരാതി പറയാനെത്തിയ നാട്ടുകാരെ കാരശ്ശേരി പാറത്തോട് മേഖലയില്‍ ക്വാറിയിലെ ജീവനക്കാര്‍ മര്‍ദിച്ചതായും പരാതിയുണ്ട്. രാവിലെ ആറു മുതല്‍ വൈകിട്ട് ആറു വരെയാണ് ക്വാറിയുടെയും ക്രഷറിന്റെയും പ്രവര്‍ത്തന സമയമെന്നിരിക്കെ രാത്രി വൈകിയും അതിരാവിലെയും ക്വാറിയിലേക്ക് ടിപ്പര്‍ ലോറികളും മറ്റും വരുന്നതിനാല്‍ ഉറങ്ങാനോ കുട്ടികള്‍ക്ക് പഠിക്കാനോ പറ്റാത്ത അവസ്ഥയാണന്ന് നാട്ടുകാര്‍ പറയുന്നു.
എന്നാല്‍ സബ് കലക്ടറുടെ നേതൃത്വത്തിലുള്ള സംഘത്തിന്റെ പരിശോധന പ്രഹസനമായിരുന്നെന്ന് നാട്ടുകാര്‍ ആരോപിച്ചു.