മുംബൈ: യാത്രക്കാരന്‍ ബഹളം വച്ചതിനെത്തുടര്‍ന്ന് ദുബൈ-കോഴിക്കോട് ഇന്‍ഡിഗോ വിമാനം അടിയന്തിരമായി മുംബൈയില്‍ ഇറക്കി. വിമാനം പുറപ്പെട്ട ഉടനെ യാത്രക്കാരിലൊരാള്‍ അസ്വാഭാവികമായി പെരുമാറുകയും ബഹളം വെക്കുകയുമായിരുന്നു. ഇയാള്‍ക്ക് മാനസിക അസ്വാസ്ഥ്യമുള്ളതായും സംശയമുണ്ട്.

അതേ സമയം ഇയാള്‍ ഐ.എസിനെക്കുറിച്ച് മുദ്രാവാക്യം വിളിച്ചെന്നാണ് സഹയാത്രികര്‍ പറയുന്നത്. എന്നാല്‍ ഇന്‍ഡിഗോ എയര്‍ലൈന്‍സ് അധികൃതര്‍ ഇക്കാര്യം സ്ഥിരീകരിച്ചിട്ടില്ല. വിമാനത്തില്‍ എഴുന്നേറ്റ് നിന്ന് ബഹളമുണ്ടാക്കിയ ഇയാളോട് ഇരിക്കാന്‍ സഹയാത്രികര്‍ ആവശ്യപ്പെട്ടെങ്കിലും ഇയാള്‍ അനുസരിച്ചില്ല. തടയാന്‍ ശ്രമിച്ച എയര്‍ലൈന്‍സ് ജീവനക്കാരനെ ഇയാള്‍ അക്രമിക്കാന്‍ ശ്രമിച്ചു. തുടര്‍ന്ന് സഹയാത്രികര്‍ ചേര്‍ന്ന് ഇയാളെ കീഴ്‌പ്പെടുത്തുകയായിരുന്നു. ശേഷം ഇയാളെ മുംബൈയില്‍ ഇറക്കി വിമാനം യാത്ര തുടരുകയായിരുന്നു. യാത്രക്കാരനെ മുംബൈ വിമാനത്താവളത്തില്‍ സി.ഐ.എസ്.എഫ് ചോദ്യം ചെയ്യുകയാണ്.