തിരുവനന്തപുരം: അധ്യാപകര്‍ക്കും ജീവനക്കാര്‍ക്കും ജൂലൈ ഒന്ന് മുതല്‍ ലഭ്യമാവേണ്ട ശമ്പള പരിഷ്‌കരണത്തിനുള്ള നടപടികള്‍ ഉടന്‍ ആരംഭിക്കണമെന്ന് കെ.എസ്.ടി.യു ഭാരവാഹികള്‍ മുഖ്യമന്ത്രിയെ കണ്ട് ആവശ്യപ്പെട്ടു. 2016 മുതല്‍ അധിക തസ്തികകളില്‍ നിയമിക്കപ്പെട്ട അധ്യാപകര്‍ക്ക് നിയമനാംഗീകാരവും ശമ്പളവും നല്‍കുക, പൊതുവിദ്യാഭ്യാസ മേഖലയെ തകര്‍ക്കുന്ന ഏകപക്ഷീയ പരിഷ്‌കാരങ്ങള്‍ പിന്‍വലിക്കുക, പങ്കാളിത്ത പെന്‍ഷന്‍ ഉപേക്ഷിക്കുക, ആരോഗ്യ ഇന്‍ഷുറന്‍സ് പദ്ധതിയായ മെഡിസെപ്പ് കൂടുതല്‍ സുതാര്യമാക്കുക, കെ-ടെറ്റ് സമയപരിധി ദീര്‍ഘിപ്പിക്കുക, ഐ.ടി പരിശീലനം നേടാത്ത അധ്യാപകരുടെ പ്രൊബേഷന്‍ തടയുന്ന നടപടി നിര്‍ത്തിവയ്ക്കുക തുടങ്ങി 32 ആവശ്യങ്ങള്‍ അടങ്ങിയ അവകാശപത്രിക മുഖ്യമന്ത്രി, വിദ്യാഭ്യാസമന്ത്രി, പൊതുവിദ്യാഭ്യാസ സെക്രട്ടറി, പൊതുവിദ്യാഭ്യാസ ഡയരക്ടര്‍ എന്നിവര്‍ക്ക് സമര്‍പ്പിച്ചു.

മുഖ്യമന്ത്രിയുമായി നടത്തിയ കൂടിക്കാഴ്ചയില്‍ പ്രതിപക്ഷ ഉപനേതാവ് ഡോ. എം.കെ മുനീര്‍, ടി.വി ഇബ്രാഹിം എം.എല്‍.എ, കെ.എസ്.ടി.യു പ്രസിഡന്റ് എ.കെ സൈനുദ്ദീന്‍, ജന. സെക്രട്ടറി വി.കെ മൂസ, ഓര്‍ഗനൈസിങ് സെക്രട്ടറി അബ്ദുല്ല, ട്രഷറര്‍ കരിം, ഭാരവാഹികളായ യൂസഫ്, എ.സി അന്നാവുള്ള, പി.കെ അസീസ്, പി.കെ.എം ഷഹീദ്, എം.എം ജിജുമോന്‍, ജില്ലാ ഭാരവാഹികളായ ജെ. ജമീല്‍, എസ്. ശിഹാബുദ്ദീന്‍ പങ്കെടുത്തു.