റിയാദ്: സഊദി തലസ്ഥാന നഗരിയായ റിയാദിനെ ലക്ഷ്യമാക്കി യമനിലെ വിമത വിഭാഗം തൊടുത്തുവിട്ട ബാലിസ്റ്റിക് മിസൈല്‍ പ്രതിരോധ സേന തകര്‍ത്തു. തലസ്ഥാന നഗരിയോട് ചേര്‍ന്ന് ഏകദേശം 200 കിലോമീറ്റര്‍ അകലെ പട്ടണത്തിന്റെ പടിഞ്ഞാറ് ഭാഗത്തായാണ് സംഭവമെന്ന് അല്‍ ജസീറ റിപ്പോര്‍ട്ട് ചെയ്തു.
അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ സന്ദര്‍ശനത്തിനു തലേദിവസമാണ് രാജ്യത്തിനു നേരെ ആക്രമണം നടന്നത്. ബുര്‍ഖാന്‍ ഒന്ന് ഇനത്തില്‍പെട്ട മിസൈലാണ് ഇറാന്‍ അനുകൂല യമനിലെ ഹൂതികള്‍ തൊടുത്തുവിട്ടത്. സഊദിയുടെ നേതൃത്വത്തിലുള്ള സഖ്യസൈന്യം തിരിച്ചടിച്ചിട്ടുണ്ട്. യമനിലെ സആദ ജില്ലയിലെ മജാസ് എന്ന പ്രദേശത്താണ് സഊദി സൈന്യം ശക്തമായ ബോംബാക്രമണം നടത്തിയത്. ഇവിടെ ഹൂതികള്‍ സൂക്ഷിച്ചിരുന്ന വന്‍തോതിലുള്ള ആയുധശേഖരം ആക്രമണത്തില്‍ നശിച്ചിട്ടുണ്ട്.