കെയ്‌റോ: ആഫ്രിക്കന്‍ നാഷന്‍സ് കപ്പിന്റെ മൂന്നാം റൗണ്ട് മത്സരങ്ങള്‍ക്ക് ഇന്ന് തുടക്കമാകും. രണ്ട് റൗണ്ട് മത്സരങ്ങള്‍ പൂര്‍ത്തിയായപ്പോള്‍ നാല് ടീമുകള്‍ മാത്രമാണ് രണ്ട് മത്സരത്തിലും ജയിച്ചത്. എ ഗ്രൂപ്പില്‍ ഈജിപ്ത്, ബി ഗ്രൂപ്പില്‍ നൈജീരിയ, സി ഗ്രൂപ്പില്‍ അള്‍ജീരിയ, ഡി ഗ്രൂപ്പില്‍ മൊറോക്കോ എന്നീ ടീമുകള്‍ മാത്രമാണ് രണ്ട് മത്സരങ്ങള്‍ ജയിച്ചിട്ടുള്ളത്. ഗ്രൂപ്പ് ഇ യില്‍ മാലിയും ഗ്രൂപ്പ് എഫില്‍ കാമറൂണും ഓരോ മത്സരത്തില്‍ ജയിച്ചിട്ടുണ്ട്.

ഇതോടെ ഗ്രൂപ്പ് ഇയിലും എഫിലും ഒന്നാം സ്ഥാനത്തിനും രണ്ടാം സ്ഥാനത്തിനും ശക്തമായ പോരാട്ടം നടക്കും. ഇന്ന് രാത്രി 9.30ന് നടക്കുന്ന മത്സരത്തില്‍ ബറൂണ്ടി ഗിനിയയെ നേരിടും. മറ്റൊരു മത്സരത്തില്‍ നൈജീരിയയും മഡഗാസ്‌കറും തമ്മിലാണ് ഏറ്റുമുട്ടുന്നത്. ആതിഥേയരായ ഈജിപ്ത് ഉഗാണ്ടയേയും സിംബാബ്‌വെ കോംഗോയെയും നേരിടും.
രാത്രി 12. 30ന് ദക്ഷിണാഫ്രിക്ക-മോറൊക്കോ, നമീബിയ-ഐവറി കോസ്റ്റ് എന്നീ മത്സരങ്ങള്‍ നടക്കും. ഈജിപ്ത്, നൈജീരിയ, അള്‍ജീരിയ, മൊറോക്കോ എന്നിവര്‍ ക്വാര്‍ട്ടര്‍ ഉറപ്പിച്ചിട്ടുണ്ട്. ഇനിയുള്ള മത്സരങ്ങളില്‍ ഇവര്‍ തോല്‍ക്കുകയാണെങ്കിലും രണ്ടാം സ്ഥാനത്തോടെ പ്രീ ക്വാര്‍ട്ടറില്‍ പ്രവേശിക്കാം.