വാഷിങ്ടണ്‍: നിയുക്ത യു.എസ് പ്രസിഡന്റ് ജോ ബൈഡന്‍ സ്റ്റേറ്റ് സെക്രട്ടറിയായി ആന്റണി ബ്ലിന്‍കനെ നിയമിക്കുമെന്ന് റിപ്പോര്‍ട്ട്. ബൈഡനുമായി അടുത്ത വൃത്തങ്ങളെ ഉദ്ധരിച്ച് ന്യൂയോര്‍ക്ക് ടൈംസ്, ബ്ലൂംബെര്‍ഗ് അടക്കമുള്ള മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്. അടുത്തദിവസം തന്നെ ഇതു സംബന്ധിച്ച് പ്രഖ്യാനം ഉണ്ടാവുമെന്നാണ് വിലയിരുത്തല്‍. 58കാരനായ ബ്ലിന്‍കന്‍ ഒബാമ പ്രസിഡന്റും ബൈഡന്‍ വൈസ്പ്രസിഡന്റും ആയിരിക്കെ ഡെപ്യൂട്ടി സ്റ്റേറ്റ് സെക്രട്ടറിയായും ദേശീയ സുരക്ഷാ ഉപദേഷ്ടാവും സേവനം അനുഷ്ടിച്ചിരുന്നു.

ആഗോള സഖ്യത്തിന്റെ സംരക്ഷകന്‍ എന്നാണ് ബ്ലിന്‍കനെ ന്യൂയോര്‍ക്ക് ടൈംസ് വിശേഷിപ്പിച്ചത്. അമേരിക്കയുടെ സഖ്യകക്ഷികളെ ചൈനയുമായുള്ള പുതിയ മത്സരത്തിന് പ്രേരിപ്പിക്കാന്‍ അദ്ദേഹത്തിന് കഴിയുമെന്നും ന്യൂയോര്‍ക്ക് ടൈം വിലയിരുത്തുന്നു.

തന്റെ അടുത്ത സഹായിയായ ജെയ്ക് സുള്ളിവനെ ദേശീയ സുരക്ഷാ ഉപദേഷ്ടാവായും ലിന്‍ഡ തോമസിനെ യു.എന്‍ അംബാസഡറായും നിയമിക്കുമെന്നും റിപ്പോര്‍ട്ടുണ്ട്.
ഇറാനുമായുള്ള യു.എസ് നിലപാട് മാറ്റണമെന്ന് ആവശ്യപ്പെടുന്നയാളാണ് ബ്ലിന്‍കന്‍. 2015ല്‍ ഒബാമ പ്രസിഡന്റായിരിക്കെ ഇറാനുമായി ആണവ കറാറിലെത്തിയതില്‍ പ്രധാന വഹിച്ചതും ഇദ്ദേഹമായിരുന്നു.