മലപ്പുറം: വിശുദ്ധ മക്കയും അറഫയും മദീനയും മനസില്‍ കണ്ടു മനം നിറഞ്ഞ പ്രാര്‍ഥനയോടെ ഹാജിമാര്‍ പൂക്കോട്ടൂരില്‍ നിന്നും മടങ്ങി. വിശുദ്ധ മണ്ണിലേക്ക് തീര്‍ഥാടനത്തിനൊരുങ്ങിയ ആയിരങ്ങള്‍ക്ക് ഹജ്ജിന്റെ കര്‍മപാഠങ്ങള്‍ പകര്‍ന്ന ദ്വിദിന പഠന ക്യാംപിനു പൂക്കോട്ടൂര്‍ ഖിലാഫത്ത് നഗരിയില്‍ സമാപ്തിയായി. മനസു നിറയെ  കിനാവു കണ്ട പുണ്യഭൂമിയിലേക്ക് എത്താനുള്ള തിടുക്കം. ആയിരങ്ങളൊന്നിച്ചു ചേര്‍ന്ന ലബ്ബൈക്ക് മന്ത്രങ്ങള്‍. ക്ലാസിനു പരിസമാപ്തിയായി ഭക്തസാന്ദ്രമായ പ്രാര്‍ഥനാ സദസും. നഗരിയില്‍ നിന്നു മടങ്ങുന്നവര്‍ക്ക് മറക്കാനാവാതെ രണ്ടുദിവസം വിരുന്നൂട്ടിയ പൂക്കോട്ടൂരിലെ പ്രദേശവാസികളുടെ  സ്‌നേഹ വായ്പ്. പുണ്യഭൂമിയിലെ പ്രാര്‍ഥന പകരം ചോദിക്കുന്ന നാട്ടുകാര്‍. ഹാജിമാരുടെയും സംഘാടകരുടേയും വികാരവായ്പുകള്‍ നിറഞ്ഞതായിരുന്നു ഇന്നലെ വൈകിട്ട് നടന്ന ഹജ്ജ് ക്യാംപിന്റെ സമാപന സെഷന്‍.
രണ്ടു ദിവസങ്ങളിലായി ഒന്‍പത് മണിക്കൂറോളം  സമയമാണ്  ക്ലാസ് നീണ്ടുനിന്നത്. ഹജ്ജ് ശ്രേഷ്ഠതകളും കര്‍മാനുഷ്ഠാനങ്ങളും പുണ്യസ്ഥലങ്ങളുടെ ചരിത്രവും വിശകലനം ചെയ്താണ്  ഹജ്ജിന്റെ ഗൃഹപാഠങ്ങള്‍ പ്രമുഖ വാഗ്മി അബ്ദുസമദ് പൂക്കോട്ടൂര്‍ അവതരിപ്പിച്ചത്.
ലളിതവും  സമ്പൂര്‍ണവുമായ  പഠനക്ലാസ് ശ്രോദ്ധാക്കള്‍ക്ക് വലിയ അനുഭൂതിയായി. ത്വവാഫ് മുതലുള്ള ഭാഗങ്ങളാണ ്‌രണ്ടാം ദിവസം ചര്‍ച്ച ചെയ്തത്. കഅ്ബ, ജംറ എന്നിവയുടെ  മാതൃക ഉപയോഗിച്ച് ത്വവാഫ്, സഅ്‌യ്, ജംറകളിലെ അനുഷ്ഠാനങ്ങള്‍ എന്നിവയുടെ പരിശീലനവും നല്‍കി. പതിനായിരത്തിലേറെ വരുന്ന പ്രതിനിധികള്‍ക്ക് എല്ലാവിധ സൗകര്യങ്ങളും സംവിധാനിച്ച് സംഘാടക സമിതിയുടെ ക്രമീകരണങ്ങള്‍ ശ്രദ്ധേയമായിരുന്നു. പാണക്കാട് സയ്യിദ് സ്വാദിഖലി ശിഹാബ് തങ്ങളുടെ നേതൃത്വത്തില്‍  എ.എം കുഞ്ഞാന്‍. കെ.മുഹമ്മദുണ്ണി ഹാജി, എ.എം അക്ബര്‍, കെ.പി ഉണ്ണീതു ഹാജി, ടി.വി ഇബ്‌റാഹീം എം.എല്‍.എ, കെ.മമ്മദ് ഹാജി, അഡ്വ.കാരാട്ട് അബ്ദുറഹ്മാന്‍, ഹസന്‍ സഖാഫി പൂക്കോട്ടൂര്‍, പി.എ സലാം, വേട്ടശ്ശേരി യൂസുഫ് ഹാജി, പിഎം.ആര്‍ അലവി ഹാജി, എം.ഹുസൈന്‍ മുസ്‌ലിയാര്‍, വി.പി സലീം മാസ്റ്റര്‍, കെ.കുഞ്ഞിപ്പു, എം.ഹുസൈന്‍, യൂനുസ് ഫൈസ്, കെ.ഉസ്മാന്‍, പി.ഉമര്‍ മാസ്റ്റര്‍ തുടങ്ങിയവര്‍ നേതൃത്വം നല്‍കി.