അമ്പലപ്പുഴ: മരത്തില്‍ തൂങ്ങി മരിച്ച നിലയില്‍ കണ്ടെത്തിയ യുവാവിന്റെ മൃതദേഹം പോസ്റ്റുമോര്‍ട്ടം ചെയ്തു.
ബീഹാര്‍ ആരാ ജില്ലയില്‍ ശിവമുനി റാമിന്റെ മകന്‍ വികാസ് കുമാറിന്റെ (17) മൃതദേഹമാണ് ഇന്നലെ മെഡിക്കല്‍ കോളജാശുപത്രിയില്‍ പോസ്റ്റുമോര്‍ട്ടം ചെയ്തത്.
ശിവ മുനി റാം ഉള്‍പ്പെടെയുള്ള ബന്ധുക്കള്‍ ഇന്നലെ ട്രെയിന്‍ മാര്‍ഗം ബീഹാറില്‍ നിന്ന് പുന്നപ്രയില്‍ എത്തിയിരുന്നു. മോര്‍ച്ചറിയില്‍ സൂക്ഷിച്ച മൃതദേഹം ബന്ധുക്കള്‍ തിരിച്ചറിഞ്ഞ ശേഷമാണ് പോസ്റ്റുമോര്‍ട്ടം ആരംഭിച്ചത്.
സൂററ്റില്‍ ജോലി തേടി നാല് മാസം മുന്‍പാണ് യുവാവ് നാട്ടില്‍ നിന്ന് തിരിച്ചതെന്ന് ബന്ധുക്കള്‍ പറഞ്ഞു. ഒരാഴ്ച മുന്‍പ് താന്‍ കേരളത്തിലുണ്ടെന്ന വിവരം കാട്ടി വികാസ് കുമാര്‍ ഫോണ്‍ ചെയ്തിരുന്നു.
മരണ കാരണം എന്താണെന്ന് അറിയില്ലെന്നും ബന്ധുക്കള്‍ പൊലിസിനോടു പറഞ്ഞു.
കഴിഞ്ഞ വെള്ളിയാഴ്ചയാണ് വികാസ് കുമാറിനെ പുന്നപ്ര കപ്പക്കടക്ക് സമീപം തീരദേശത്ത് മരത്തില്‍ തൂങ്ങിയ നിലയില്‍ കണ്ടത്. ഉടുപ്പിലുണ്ടായിരുന്ന കടലാസില്‍ നിന്നാണ് യുവാവിന്റെ വിലാസം ലഭിച്ചത്.
ഇരു കൈയും പുറകില്‍ കയര്‍ കൊണ്ട് കെട്ടിയിരുന്ന മൃതദേഹത്തിന്റെ മുഖവും തുണികൊണ്ട് മറച്ചിരുന്നു.
സംഭവത്തെ കുറിച്ച് പൊലിസ് അന്വേഷണം ഊര്‍ജിതമാക്കിയിട്ടുണ്ട്. യുവാവിന്റെ സംസ്‌കാരം സംബന്ധിച്ച് ഇന്ന് തീരുമാനമുണ്ടാകും. പോസ്റ്റുമോര്‍ട്ടത്തിനു ശേഷം മൃതദേഹം മോര്‍ച്ചറിയില്‍ സൂക്ഷിച്ചിരിക്കുകയാണ് .