മാള: മേഖലയിലെ വിവിധ പഞ്ചായത്തുകളില്‍ ജലനിധിക്കായി പൊളിച്ച റോഡുകളിലെ കുഴികളും തോടുകളും അപകട ഭീഷണി ഉയര്‍ത്തുന്നു.  പുതിയ കണക്ഷനുകള്‍ നല്‍കുന്നതിനായാണ് റോഡുകള്‍ കുറുകെ പൊളിച്ചിത്.
നൂറു മീറ്ററിനിടയില്‍ നാലും അഞ്ചും വരെ ചാലുകള്‍ റോഡുകളില്‍ കീറിയിട്ടുണ്ട്. കൂടുതലായും പഞ്ചായത്ത് റോഡുകളിലാണ് കണക്ഷനായുള്ള ചാലുകള്‍ കീറിയിട്ടുള്ളത്. അടുത്തടുത്തായുള്ള ചാലുകള്‍ കൂടുതലായും ഭീഷണി ഉയര്‍ത്തുന്നത്. യാത്രക്കാര്‍ക്ക് പരുക്കേല്‍ക്കുന്നത് കൂടാതെ വാഹനങ്ങള്‍ക്ക് കേടുപാടുകള്‍ സംഭവിക്കുന്നതും പതിവായി.
കുഴൂര്‍ ഗ്രാമപഞ്ചായത്തിലെ ഏഴാം വാര്‍ഡിലും എട്ടാം വാര്‍ഡിലും ഉള്‍പ്പെടുന്ന കൊച്ചുകടവ്കുണ്ടൂര്‍ റോഡില്‍ കഴിഞ്ഞ ദിവസമുണ്ടായ അപകട കാരണം  ജലനിധിക്കായി പൊളിച്ച ചാലുകള്‍.  അടുത്തടുത്തായുള്ള ചാലുകളില്‍ ചാടി കാറിന് കേടുപാടുകള്‍ പറ്റാതിരിക്കാനായി കാറോടിച്ചിരുന്നയാള്‍ വാഹനം പെട്ടെന്ന് ബ്രേക്കിട്ടപ്പോള്‍ പുറകിലൂടെ വരികയായിരുന്ന ഓട്ടോറിക്ഷ കാറില്‍ വന്നിടിച്ച് ഓട്ടോ ഡ്രൈവറുടെ തലക്ക് പരുക്കേറ്റു. അപ്രതീക്ഷിതമായി കാര്‍ നിന്നത് കണ്ട ഓട്ടോറിക്ഷ ഡ്രൈവര്‍ പെട്ടെന്ന് ബ്രേക്ക് ചെയ്‌തെങ്കിലും കാല്‍ തെന്നി മാറുകയായിരുന്നു. കാറിലുണ്ടായിരുന്നവര്‍ മുന്നോട്ടാഞ്ഞെങ്കിലും പരുക്കേല്‍ക്കാതെ രക്ഷപ്പെട്ടു. ഇരു വാഹനങ്ങള്‍ക്കും കാര്യമായ കേടുകള്‍ സംഭവിച്ചിട്ടുണ്ട്. സമാനമായ അപകടങ്ങളാണ് കൂടുതലായും ഇത്തരത്തിലുള്ള റോഡുകളിലുണ്ടാകുന്നത്.
റോഡിനെ കുറിച്ച് മുന്നറിവില്ലാത്തവര്‍ക്കാണ് കൂടുതലായും അപകടങ്ങള്‍ സംഭവിക്കുന്നത്. ഗര്‍ഭിണികള്‍ക്കും പ്രായമായവര്‍ക്കും കുട്ടികള്‍ക്കുമടക്കം ഗുരുതരമായ ആരോഗ്യ പ്രശ്‌നങ്ങളാണ് ഇത്തരം  റോഡുകളിലൂടെയുള്ള യാത്രകള്‍ സമ്മാനിക്കുന്നത്.
വീതി കുറഞ്ഞ റോഡുകളിലെ നല്ലൊരു ഭാഗം ഇത്തരത്തില്‍ പൊളിച്ചതിനാല്‍ ഒരേസമയം രണ്ടു വാഹനങ്ങള്‍ക്ക് കടന്നു പോകാനാകാത്ത അവസ്ഥയുമുണ്ട്. ടാറിങ് നാമമാത്രമായുള്ള റോഡുകളില്‍ മഴ പെയ്ത ശേഷം ചെളിക്കുളം രൂപപ്പെടുന്നത് കൂടാതെ വെയിലാകുമ്പോള്‍ പൊടിപടലങ്ങള്‍ പാറുന്ന അവസ്ഥയുമുണ്ട്.