ഡേറം: ലോകകപ്പ് ക്രിക്കറ്റില്‍ ഇംഗ്ലണ്ടിനെതിരെ ന്യൂസിലന്‍ഡിന് 306 റണ്‍സ് വിജയലക്ഷ്യം. എട്ടു വിക്കറ്റ് നഷ്ടത്തിലാണ് ഇംഗ്ലണ്ട് 305 റണ്‍സെടുത്തത്.

കളിയില്‍ ടോസ് നേടിയ ഇംഗ്ലണ്ട് ബാറ്റിങ് തെരഞ്ഞെടുക്കുകയായിരുന്നു. ഓപ്പണര്‍മാരായ ജേസണ്‍ റോയിയും ജോണി ബെയര്‍സ്‌റ്റോയുമാണ് ഇംഗ്ലണ്ടിനെ ശരാശരി പ്രകടനത്തിലെത്തിച്ചത്. ബെയര്‍‌സ്റ്റോ (109), ജേസണ്‍ റോയി (60), നായകന്‍ ഓയ്ന്‍ മോര്‍ഗന്‍ (42) എന്നിവരാണ് ഇംഗ്ലണ്ട് നിരയില്‍ മികച്ച സ്‌കോര്‍ നേടിയത്.

സ്‌കോര്‍ 123 നില്‍ക്കെയാണ് ഇംഗ്ലണ്ടിന് ആദ്യ വിക്കറ്റ് നഷ്ടമായത്. ജെയിംസ് നിഷാമിന്റെ പന്താണ് സെഞ്ചുറി കൂട്ടുകെട്ട് പൂര്‍ത്തിയാക്കിയ ജേസണെയും ബെയര്‍‌സ്റ്റോയെയും പിരിച്ചത്.

ന്യൂസിലാന്‍ഡ് നിരയില്‍ ട്രെന്റ് ബോള്‍ട്ട്, മാറ്റ് ഹെന്റി, ജെയിംസ് നിഷാം എന്നിവര്‍ രണ്ട് വിക്കറ്റുകളും മിച്ചല്‍ സാന്‍ത്‌നെര്‍, ടിം സൗതീ എന്നിവര്‍ ഓരോ വിക്കറ്റുകളും നേടി.

എട്ട് വീതം മത്സരങ്ങളില്‍ നിന്നായി 10 പോയിന്റ് ഇംഗ്ലണ്ടിനും 11പോയിന്റ് ന്യൂസിനന്‍ഡിനുമുണ്ട്. ഇന്ന് വിജയിക്കുന്ന ടീമിന് സെമിഫൈനലില്‍ പ്രവേശിക്കാം. പരാജയപ്പെടുന്നവര്‍ക്ക് മറ്റ് മത്സരഫലങ്ങള്‍ കൂടി ആശ്രിയിച്ചേ മുന്നോട്ടു പോകാനാകൂ. ഡേറം ചെസ്റ്റര്‍ ലെ സ്ട്രീറ്റിലാണ് മത്സരം നടക്കുന്നത്.