കൊണ്ടോട്ടി: കരിപ്പൂര്‍ വിമാനത്താവളത്തില്‍ 19.20 ലക്ഷം രൂപയുടെ സ്വര്‍ണം പ്രിവന്റീവ് കസ്റ്റംസ് വിഭാഗം പിടികൂടി. കോഴിക്കോട് പാറക്കടവ് ചെട്ടിയാട് സ്വദേശി ഷിജിലേഷില്‍ (31) നിന്നാണ് സ്വര്‍ണം കണ്ടെത്തിയത്.

ദുബൈയില്‍നിന്നുള്ള എയര്‍ഇന്ത്യ എക്‌സ്പ്രസ് വിമാനത്തിലാണ് ഇയാള്‍ കരിപ്പൂരിലെത്തിയത്. രഹസ്യവിവരം ലഭിച്ചതിനെ തുടര്‍ന്ന് കോഴിക്കോട് നിന്നെത്തിയ കസ്റ്റംസ് പ്രിവന്റീവ് വിഭാഗം ഷിജിലേഷിനെ കസ്റ്റഡിയിലെടുത്ത് ചോദ്യം ചെയ്യുകയായിരുന്നു.780 ഗ്രാം സ്വര്‍ണമിശ്രിതമാണ് കണ്ടെടുത്തത്. ഇതില്‍നിന്ന് 600 ഗ്രാം സ്വര്‍ണം വേര്‍തിരിച്ചെടുത്തു.
കസ്റ്റംസ് ഡെപ്യൂട്ടി കമ്മിഷണര്‍ നിഥിന്‍ലാല്‍, സൂപ്രണ്ടുമാരായ എം. പ്രദീപ്, പ്രേംകുമാര്‍ എന്നിവര്‍ പരിശോധനക്ക് നേതൃത്വം നല്‍കി.