ടൂറിന്‍: ഇതിഹാസ ഗോള്‍കീപ്പര്‍ ജിയാന്‍ലൂജി ബഫണ്‍ വീണ്ടും യുവന്റസില്‍. ഒരു വര്‍ഷത്തെ കരാറിലാണ് താരം വീണ്ടും യുവന്റസിലെത്തിയത്. കഴിഞ്ഞ സീസണിലായിരുന്നു യുവന്റസില്‍ നിന്ന് പി.എസ്.ജിയിലേക്ക് ബഫണ്‍ ചേക്കേറിയത്. ഇന്നലെ ടൂറിനില്‍ എത്തിയ ബഫണ്‍ മെഡിക്കല്‍ പൂര്‍ത്തിയാക്കി.

തന്റെ ഏറ്റവും ഇഷ്ടപ്പെട്ട ക്ലബില്‍ തന്നെ കരിയര്‍ അവസാനിപ്പിക്കാനാണ് ബഫണ്‍ തിരികെ എത്തുന്നത്. ഒപ്പം ഒരു ചാംപ്യന്‍സ് ലീഗ് കിരീടമെന്ന ലക്ഷ്യവും ബഫണിനുണ്ട്. ചാംപ്യന്‍സ് ലീഗ് നേടാമെന്ന മോഹത്തിലായിരുന്നു ഇറ്റലി വിട്ട് ബഫണ്‍ ഫ്രാന്‍സില്‍ എത്തിയത്. പക്ഷേ ചാംപ്യന്‍സ് ലീഗ് ക്വാര്‍ട്ടര്‍ പോലും കാണാതെ പി.എസ്.ജി പുറത്തായി.

ഈ സ്വപ്നം യുവന്റസിനൊപ്പം പൂര്‍ത്തിയാക്കാമെന്നാണ് ബഫണിന്റെ പ്രതീക്ഷ. 17 വര്‍ഷങ്ങള്‍ യുവന്റസിനൊപ്പം കളിച്ച താരമാണ് ബഫണ്‍. 9 ഇറ്റാലിയന്‍ ലീഗ് കിരീടവും 4 കോപ ഇറ്റാലിയ കിരീടവും അടക്കം 21 കിരീടങ്ങള്‍ യുവന്റസിനൊപ്പം ബഫണ്‍ നേടിയിട്ടുണ്ട്.