കോഴിക്കോട്: മിഠായിത്തെരുവില്‍ സുരക്ഷാ മാനദണ്ഡങ്ങള്‍ പാലിക്കാത്ത 192 കടകള്‍ അടച്ചുപൂട്ടണമെന്ന നോട്ടിസിന്റെ സമയപരിധി ഇന്നലെ അവസാനിച്ചിരിക്കെ കടയടപ്പിക്കലിനെതിരേ വ്യാപാരികള്‍ രംഗത്ത്. മിഠായിത്തെരുവിലെ കടകളുടെ സുരക്ഷാ ക്രമീകരണവുമായി ബന്ധപ്പെട്ടു നടത്തിയ പരിശോധനയില്‍ സുരക്ഷയില്ലെന്ന കാരണത്തില്‍ കടകളടപ്പിക്കാനുള്ള നടപടി അനുവദിക്കില്ലെന്ന് വ്യാപാരി വ്യവസായി ഏകോപന സമിതി അധ്യക്ഷന്‍ ടി. നസ്‌റുദ്ദീന്‍ പറഞ്ഞു. കടയടക്കാന്‍ നോട്ടിസ് ലഭിച്ച വ്യാപാരികളുടെ യോഗത്തില്‍ സംസാരിക്കുകയായിരുന്നു അദ്ദേഹം.
ഡി.ആന്‍ഡ് ഒ സര്‍ട്ടിഫിക്കറ്റില്ലെന്ന കാരണത്തില്‍ ചില ഉദ്യോഗസ്ഥരുടെ ഗൂഢശ്രമമാണ് കടകളടപ്പിക്കുന്നതിന്റെ പിന്നില്‍. മിഠായിത്തെരുവിന്റെ പ്രധാന്യം നഷ്ടപ്പെടുത്താനാണ് ഇവര്‍ പ്രവര്‍ത്തിക്കുന്നത്. പുതുതായി വന്ന കലക്ടറുടെ ഉത്തരവിനെ മറികടക്കാനാണ് ചില ഉദ്യോഗസ്ഥര്‍ ശ്രമിക്കുന്നത്. തദ്ദേശ സ്വയംഭരണ വകുപ്പിന് സുരക്ഷാ പ്രശ്‌നങ്ങള്‍ ചൂണ്ടിക്കാണിച്ച് പിഴ ചുമത്താനെ അധികാരമുള്ളൂ. അല്ലാതെ കടയടപ്പിക്കാന്‍ അവകാശമില്ല. എന്തു വില കൊടുത്തും മിഠായിത്തെരുവിലെ കടകളെ സംരക്ഷിക്കും. ഒരു കടയടപ്പിച്ചാല്‍ മിഠായിത്തെരുവിലെ മുഴുവന്‍ കടകളും അടച്ചുപൂട്ടും.
മിഠായിത്തെരുവ് നവീകരിക്കുന്നതില്‍ അസൂയ പൂണ്ടവരാണ് കടയടപ്പിക്കല്‍ ഉത്തരവിന് പിന്നില്‍. ഡി.ആന്‍ഡ് ഒ സര്‍ട്ടിഫിക്കറ്റ് ലഭിക്കാന്‍ ഒരുപാട് സമയമെടുക്കും. മിഠായിത്തെരുവിലെ കടകള്‍ നില്‍ക്കുന്നിടത്തുള്ള ജന്മി പ്രശ്‌നമാണ് ഡി.ആന്‍ഡ് ഒ സര്‍ട്ടിഫിക്കറ്റ് കിട്ടുന്നത് വൈകാന്‍ കാരണം. അഗ്നിശമന പ്രധിരോധത്തിനായുള്ള സര്‍വ സജ്ജീകരണങ്ങള്‍ ഒരുക്കിയിട്ടും ഒരു കടലാസിന്റെ പേരു പറഞ്ഞാണ് കടകളടപ്പിക്കാന്‍ ശ്രമിക്കുന്നത്. സര്‍ട്ടിഫിക്കറ്റ് ലഭിക്കുന്നത് എളുപ്പമാക്കാന്‍ തദ്ദേശ സ്വയംഭരണ മന്ത്രിയെയും കലക്ടറെയും കണ്ട് സംസാരിക്കുമെന്നും അദ്ദേഹം അറിയിച്ചു.
അതേസമയം സുരക്ഷാ സംവിധാനങ്ങള്‍ ഏര്‍പ്പെടുത്താത്ത വ്യാപാരസ്ഥാപനങ്ങള്‍ അടച്ചുപൂട്ടാനുള്ള സമയപരിധി ഇന്നലെ അവസാനിച്ചതോടെ വരും ദിവസങ്ങളിലെ ജില്ലാ ഭരണകൂടത്തിന്റെ നീക്കം നിര്‍ണായകമാകും.