റിയാദ്: വിദേശ രാജ്യങ്ങളില്‍ നിന്നുള്ള അധ്യാപകരെ റിക്രൂട്ട് ചെയ്യുന്നതിനായി വിസ അനുവദിക്കരുതെന്ന് ശൂറ കൗണ്‍സില്‍.

ഉന്നത ബിരുദ ധാരികള്‍ സഊദിയില്‍ തന്നെയുള്ളതിനാല്‍ സര്‍ക്കാര്‍, സ്വകാര്യ സര്‍വ്വകലാശാലകളിലേക്കും സ്‌കൂളുകളിലേക്കുമുള്ള വിദേശ അധ്യാപകരെ റിക്രൂട്ട് ചെയ്യുന്നതിന് അവസാനിപ്പിക്കണമെന്ന് ശൂറ കൗണ്‍സിലിലെ യുവജന, കുടുംബ കമ്മിറ്റിയാണ് ശിപാര്‍ശ ചെയ്തത്. രാജ്യത്ത് ഉന്നത ബിരുദ ധാരികള്‍ വര്‍ധിച്ചു വരികയാണെന്നും ഇതിനു പരിഹാരമായി ഇവിടങ്ങളില്‍ അധ്യാപകരായി ഇവരെ നിയമിക്കണമെന്നുമാണ് സമിതി ശുപാര്‍ശ ചെയ്തത്.

തൊഴില്‍, സാമൂഹിക വികസന മന്ത്രാലയത്തിന്റെ വാര്‍ഷിക റിപ്പോര്‍ട്ട് വിശകലനം ചെയ്തു ഇതടക്കം പന്ത്രണ്ടു ശുപാര്‍ശകള്‍ കൂടി സമിതി മുന്നോട്ടു വെച്ചിട്ടുണ്ട്.

രാജ്യത്ത് നിരവധി ഉന്നത ബിരുദ ധാരികള്‍ നിലവിലുണ്ട്. ഇവരുടെ ബിരുദങ്ങള്‍ക്കനുസരിച്ചുള്ള തൊഴിലുകള്‍ കണ്ടെത്താന്‍ മന്ത്രാലയം ശ്രമം തുടരണം. പ്രാദേശിക തൊഴില്‍ വിപണി കൂടുതല്‍ ആകര്ഷണീയമാകാന്‍ ദേശീയ സമ്പദ് വ്യവസ്ഥക്ക് ഏറെ സഹായകമാകുന്ന തൊഴിലുകളിലും വിദേശികള്‍ വ്യാപകമായ തൊഴില്‍ മേഖലകളിലും സഊദി വല്‍ക്കരണത്തിനു ഊന്നല്‍ നല്‍കണം.

വിദ്യാഭ്യാസ മേഖലയില്‍ സഊദിവല്‍ക്കരണം ശക്തമാക്കണമെന്നും ആരോഗ്യ, എഞ്ചിനീയറിങ് സാങ്കേതിക മേഖലകളില്‍ വിദേശികളുടെ ആധിപത്യമാണ് ഇപ്പോഴുമെന്നും അഭിപ്രായപ്പെട്ടു. സഊദി വല്‍ക്കരണം നടപ്പിലാക്കിയ ജ്വല്ലറി പോലെയുള്ളതില്‍ കൂടുതല്‍ പരിശീലനം നല്‍കി ഘട്ടം ഘട്ടമായാണ് സഊദി വല്‍ക്കരണം നടപ്പാക്കേണ്ടതെന്നും സമിതി അഭിപ്രായപ്പെട്ടു.