തിരുവനന്തപുരം: തദ്ദേശ തെരഞ്ഞെടുപ്പിനു മുന്നോടിയായി യു.ഡി.എഫ് സംസ്ഥാനസമിതിയുടെ ആഭിമുഖ്യത്തില്‍ ഈ മാസം അഞ്ചിനു വെര്‍ച്വല്‍ റാലി സംഘടിപ്പിക്കുമെന്ന് മുന്നണി കണ്‍വീനര്‍ എം.എം ഹസന്‍ അറിയിച്ചു.
സംസ്ഥാന സര്‍ക്കാരിന്റെ അഴിമതിയും ജനദ്രോഹനടപടികളും വികസനവിരുദ്ധ മനോഭാവവും ചൂണ്ടിക്കാട്ടിയാണ് റാലി സംഘടിക്കുന്നത്. ഉച്ചയ്ക്ക് 12 മുതല്‍ ഒരുമണി വരെ നടത്തുന്ന വെര്‍ച്വല്‍ റാലി പ്രതിപക്ഷനേതാവ് രമേശ് ചെന്നിത്തല ഉദ്ഘാടനം ചെയ്യും. എം.എം ഹസന്‍ അധ്യക്ഷനാകും. കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍, മുന്‍ മുഖ്യമന്ത്രി ഉമ്മന്‍ചാണ്ടി, യു.ഡി.എഫ് നേതാക്കളായ പി.കെ കുഞ്ഞാലിക്കുട്ടി, പി.ജെ ജോസഫ്, എന്‍.കെ പ്രേമചന്ദ്രന്‍, അനൂപ് ജേക്കബ്, സി.പി ജോണ്‍, ജി. ദേവരാജന്‍, ജോണ്‍ ജോണ്‍ എന്നിവര്‍ പങ്കെടുക്കും.