മാഡ്രിഡ്: അത്‌ലറ്റിക്കോ മാഡ്രിഡിന്റെ ഫ്രഞ്ച് താരം അന്റോയിന്‍ ഗ്രിസ്മാന്‍ ക്ലബ് മാറിയേക്കും. തന്റെ ഭാവി രണ്ടാഴ്ച്ചയ്ക്കകം തീരുമാനിക്കുമെന്ന് താരം വ്യക്തമാക്കി. ഗ്രിസ്മാന്‍ ഇംഗ്ലീഷ് പ്രീമിയര്‍ ലീഗ് ക്ലബായ മാഞ്ചസ്റ്റര്‍ യുനൈറ്റഡിലേക്ക് പോകുമെന്നാണ് സൂചന. യുനൈറ്റഡിലേക്ക് പോകാന്‍ പത്തില്‍ ആറാണ് സാധ്യതയെന്ന് ഗ്രിസ്മാന്‍ സൂചിപ്പിച്ചു.
ഗ്രിസ്മാനെ ക്ലബിലെത്തിക്കാന്‍ യുനൈറ്റഡ് പരിശീലകന്‍ ഹോസെ മൗറീഞ്ഞോ താല്‍പര്യപ്പെടുന്നുണ്ടെന്നാണ് റിപ്പോര്‍ട്ട്. ദീര്‍ഘകാലമായി താരവുമായി ക്ലബ് വൃത്തങ്ങള്‍ ചര്‍ച്ച നടത്തുന്നുണ്ട്. നേരത്തെ യുവേഫ ചാംപ്യന്‍സ് ലീഗിന് യുനൈറ്റഡ് യോഗ്യത നേടിയാല്‍ മാത്രമേ ക്ലബിലേക്ക് മാറാന്‍ സാധ്യതയുള്ളൂവെന്ന് അഭ്യൂഹമുണ്ടായിരുന്നു.
ഗ്രിസ്മാനായി 80 മില്യണിന്റെ വാഗ്ദാനമാണ് ക്ലബ് മുന്നോട്ടുവയ്ക്കുന്നത്.
ഈ തുകയോട് താരത്തിന് താല്‍പര്യമുള്ളതായി ഫ്രഞ്ച് മാധ്യമങ്ങള്‍ റിപ്പോര്‍ട്ടു ചെയ്തു.