കൂറ്റനാട്: നെല്ല് ഇതുവരെയും സംഭരിക്കാത്തതിനാല്‍ കര്‍ഷകര്‍ ആശങ്കയില്‍. ഇട്ടോണം പാടശേഖരം മഹാത്മ ഫാര്‍മേഴ്‌സ് ക്ലബിന്റെ ആഭിമുഖ്യത്തില്‍ 25 ഏക്കറില്‍ കൃഷി ചെയ്ത നെല്ലാണ് ഇതുവരേയും സംഭരിച്ചിക്കാത്തത്്. ജ്യോതി ഇനം നെല്ലാണ് കൃഷി ചെയ്തത്. രണ്ടാഴ്ചയായി കൊയ്ത്തു കഴിഞ്ഞ നെല്ല് കൂട്ടിയിട്ടിരിക്കയാണ്. സംഭരണം വൈകിയാല്‍ നെല്ല് നശിച്ചുപോകുമെന്ന പേടിയിലാണ് കര്‍ഷകര്‍.
കൃഷിഭവന്‍ മുഖാന്തിരം സപ്ലൈകോയിലും, ഓയില്‍പാമിലും സംഭരണത്തിനായി രജിസ്റ്ററേഷന്‍ നടത്തിയിട്ടുണ്ടെങ്കിലും ആരുംതന്നെ സംഭരണത്തിനായി ഇതുവരെ എത്തിയിട്ടില്ല. ഈ പ്രദേശത്ത് ഒന്നാം വിള കൃഷി ചെയ്ത ഏക പാടശേഖരമാണ് ഇട്ടോണം പാടശേഖരം. പ്രതികൂലമായിരുന്ന കാലാവസ്ഥയോട് പൊരുതി ജയിച്ച് വിളയിച്ചെടുത്ത നെല്ല് നശിച്ചുപോകുമോ എന്ന ആശങ്കയിലാണ് പാടശേഖരത്തിലെ കര്‍ഷകര്‍. ഇത് ശേഖരിക്കാന്‍ എത്രയും പെട്ടെന്ന് അതികൃതര്‍ തയാറാവണമെന്നാണ് കര്‍ഷകരുടെ ആവശ്യം.