ചെറുതുരുത്തി: കേരളം ലോകത്തിന് സമ്മാനിക്കുന്ന സുപ്രസിദ്ധമായ ആയുര്‍വ്വേദ സ്ഥാപനം ചെറുതുരുത്തി ഭാരതപുഴയോട് ചേര്‍ന്ന് പ്രവര്‍ത്തിക്കുന്ന പഞ്ചകര്‍മ്മ ആയുര്‍വ്വേദ റിസേര്‍ച്ച് ഇന്‍സ്റ്റിറ്റ്യൂട്ട് പുതിയ ഉയരങ്ങള്‍ താണ്ടി ലോകത്തിന്റെ നെറുകെയിലേക്ക്. സ്ഥാപനം മട്ടും, കെട്ടും മാറി പുതിയ പ്രവര്‍ത്തന വീഥി തുറക്കുകയാണ്. ഇതിന് മുന്നോടിയായി സ്ഥാപനത്തിന്റെ പേര് തന്നെ മാറും.നാഷ്ണല്‍ ആയുര്‍വ്വേദ റിസേര്‍ച്ച് ഇന്‍സ്റ്റിറ്റുട്ട് ഫോര്‍ പഞ്ചകര്‍മ്മ എന്ന പേരിലാണ് ഇനി അറിയപ്പെടുക. പൂര്‍ണ്ണമായി കേന്ദ്ര സര്‍ക്കാര്‍ ഏറ്റെടുത്തതോടെ വലിയ വികസന മുന്നേറ്റമാണ് സ്ഥാപനത്തിന് ഉണ്ടാവുക. നിലവില്‍ 68 കിടക്കകളുള്ള ആശുപത്രിയില്‍ പുതിയ 65 കിടക്കകള്‍ കൂടി എത്തും. പത്ത് പി.ജി സീറ്റുകളും, അത്ര തന്നെ പി.എച്ച്.ഡി സീറ്റുകളും ലഭിക്കും. ഇതിന്റെ ഭാഗമായി നിളയോരത്ത് നിര്‍മിച്ച പുതിയ കെട്ടിടത്തിന്റെ ഉദ്ഘാടനം 26 ന് കാലത്ത് 10 മണിക്ക് നടക്കും. കേന്ദ്ര ആയുഷ്മന്ത്രി ശ്രീപദ് യേശോ നായിക്ക് ഉദ്ഘാടനം ചെയ്യുമെന്ന് ഇന്‍സ്റ്റിറ്റ്യൂട്ട് അസിസ്റ്റന്റ് ഡയറക്ടര്‍ ഡോ. വസന്തകുമാര്‍ അറിയിച്ചു.