മാഞ്ചസ്റ്റര്‍: ഇന്നലെ വൈകീട്ട് 6.30മുതല്‍ ആരംഭിച്ച മഴ ശമനമില്ലാതെ തുടരുന്നതിനാല്‍ നിര്‍ത്തിവച്ച ഇന്ത്യ-ന്യൂസിലന്‍ഡ് സെമിഫൈനല്‍ മത്സരം ഇന്ന് തുടരും.

ഓവറുകള്‍ വെട്ടിച്ചുരുക്കിയാണെങ്കിലും കളി തുടരാനുള്ള തീരുമാനം മഴ നിര്‍ത്താതെ പെയ്തതിനാല്‍ മാറ്റുകയായിരുന്നു. ഇന്ത്യന്‍ സമയം വൈകിട്ട് മൂന്നിന് തന്നെ മത്സരം ആരംഭിക്കും. ഇനി ന്യൂസിലന്‍ഡിന് 23 പന്തുകളാണ് ശേഷിക്കുന്നത്. ടോസ് നേടി ബാറ്റിങ് തെരഞ്ഞെടുത്ത ന്യൂസിലന്‍ഡ് 46 ഓവറില്‍ അഞ്ച് വിക്കറ്റ് നഷ്ടത്തില്‍ 211 റണ്‍സുമായി നില്‍ക്കുമ്പോഴാണ് മഴക്കളി ആരംഭിച്ചത്.

മാഞ്ചസ്റ്ററിലെ ഓള്‍ഡ് ട്രഫോര്‍ഡിലാണ് മത്സരം നടക്കുന്നത്. അര്‍ധസെഞ്ച്വറി പൂര്‍ത്തിയാക്കിയ റോസ് ടെയ്ലര്‍(67), മൂന്ന് റണ്‍സുമായി ടോം ലാഥം രഎന്നിവരാണ് ക്രീസില്‍. മാര്‍ട്ടിന്‍ ഗുപ്റ്റില്‍, ഹെന്റി നിക്കോള്‍സ്, കെയ്ന്‍ വില്യംസണ്‍, ജിമ്മി നീഷം, കോളിന്‍ ഗ്രാന്‍ഡ്ഹോം എന്നിവരുടെ വിക്കറ്റുകളാണ് ന്യൂസിലന്‍ഡിന് നഷ്ടമായത്. ഇന്ത്യക്ക് വേണ്ടി ജസ്പ്രീത് ബുംറ, രവീന്ദ്ര ജഡേജ, യുസ്വേന്ദ്ര ചഹാല്‍, ഹാര്‍ദിക് പാണ്ഡ്യ, ഭുവനേശ്വര്‍ കുമാര്‍ എന്നവര്‍ വിക്കറ്റ് നേടി.