ന്യൂഡല്‍ഹി: യു.എസ് ഭീഷണി അവഗണിച്ച് റഷ്യയുമായി വന്‍ ആയുധ ഇടപാടിന് ഒരുങ്ങി ഇന്ത്യ. റഷ്യയുടെ അത്യാധുനിക മിസൈല്‍ പ്രതിരോധ സംവിധാനമായ എസ് 400 വാങ്ങാനുള്ള കരാറില്‍ ഇന്ത്യ അടുത്താഴ്ച ഒപ്പിട്ടേക്കും. റഷ്യന്‍ പ്രസിഡന്റ് വ്‌ളാദ്മിര്‍ പുടിന്റെ ഇന്ത്യന്‍ സന്ദര്‍ശനത്തോടെയായിരുക്കും കരാറില്‍ ഒപ്പിടുകയെന്ന് റഷ്യന്‍ വൃത്തങ്ങള്‍ അറിയിച്ചു.
റഷ്യന്‍ ആയുധങ്ങള്‍ വാങ്ങിയതിന് ചൈനക്കെതിരേ യു.എസ് ഉപരോധം ഏര്‍പ്പെടുത്തിയിരുന്നു. ഇന്ത്യയുമായുള്ള ഇടപാടുകള്‍ക്ക് ഭീഷണിയില്ലെന്നും അധികൃതര്‍ അറിയിച്ചു. ലോകത്തിലെ ഏറ്റവും മികച്ച ആകാശക്കരുത്തായ എസ് 400 മിസൈല്‍ പ്രതിരോധ സംവിധാനം പത്തെണ്ണം വാങ്ങാനാണ് ഇന്ത്യ ഉദ്ദേശിക്കുന്നത്. ഏകദേശം 6.2 മില്യന്‍ ഡോളറിന്റെ(44,984 കോടി രൂപ) ഇടപാടെന്നാണ് സൂചന. കരാറിന്റെ പൂര്‍ണ വിവരങ്ങള്‍ അധികൃതര്‍ പുറത്തുവിട്ടിട്ടില്ല. ഇതു കൂടാതെ നാലു യുദ്ധക്കപ്പലുകള്‍ വാങ്ങാനുള്ള കരാറിലും റഷ്യയുമായി ഇന്ത്യ ഒപ്പിട്ടേക്കും.
റഷ്യയുമായുള്ള ഇടപാടിന്റെ പേരില്‍ ഇന്ത്യയ്ക്ക് ആശങ്ക വേണ്ടെന്നു മോസ്‌കോ കേന്ദ്രമായ അനാലിസിസ് ഓഫ് വേള്‍ഡ് ആംമ്‌സ് ട്രേഡ് തലവന്‍ ഐഗര്‍ കൊറോത്‌ചെങ്കോ പറഞ്ഞു. ഭാവിയില്‍ യുഎസ് ആയുധങ്ങള്‍ വേണ്ടെന്നു പറയാന്‍ സാധ്യതയില്ലാത്തതിനാല്‍, റഷ്യന്‍ കരാറിനെച്ചൊല്ലി ഇന്ത്യയ്ക്കുമേല്‍ അമേരിക്ക ഉപരോധം ഏര്‍പ്പെടുത്തിയേക്കില്ലെന്നും അദ്ദേഹം വ്യക്തമാക്കി.