റിയാദ്: സഊദിയില്‍ അനധികൃത് താമസക്കാര്‍ക്കെതിരെ നടത്തുന്ന ക്യാംപയിനില്‍ ഇത് വരെ പതിനെട്ടു ലക്ഷത്തിലധികം പേരെ പിടികൂടിയതായി സഊദി ആഭ്യന്തര മന്ത്രാലയം അറിയിച്ചു. രാജ്യത്തിന്റെ വിവിധ ഭാഗങ്ങളില്‍ വിവിധ വകുപ്പുകളുടെ സഹകരണത്തോടെ നടത്തുന്ന വ്യാപകമായ തിരച്ചിലിലാണ് ഇത്രയധിക അനധികൃത താമസക്കാരുടെ പിടികൂടിയത്.

കഴിഞ്ഞ പത്ത് മാസത്തിനകം പിടിയിലായ 18,08,203 പേരില്‍ 13,87,220 പേര്‍ ഇഖാമ നിയമ ലംഘകരും 2,86,114 പേര്‍ തൊഴില്‍ നിയമ ലംഘകരും 1,34,869 പേര്‍ നുഴഞ്ഞുകയറ്റക്കാരുമാണ്. മൂന്നു മാസത്തെ പൊതുമാപ്പ് പ്രഖ്യാപന ശേഷമാണ് ശക്തമായ പരിശോധന രാജ്യത്ത് തുടങ്ങിയത്.

ഇതില്‍ തന്നെ അനധികൃത വിദേശികള്‍ക്ക് സഹായങ്ങള്‍ നല്‍കിയ സ്വദേശികളെയും പിടികൂടിയിട്ടുണ്ട്. താമസ, യാത്രാ സൗകര്യങ്ങളും മറ്റു സഹായ സൗകര്യങ്ങളും ചെയ്തുകൊടുത്തതിന് 2,720 വിദേശികളെ പിടികൂടി ശിക്ഷാ നടപടികള്‍ സ്വീകരിച്ചു. നിയമ ലംഘകരെ സഹായിച്ച കുറ്റത്തിന് 691 സൗദികളും പിടിയിലായി. ഇക്കൂട്ടത്തില്‍ 668 പേര്‍ക്കെതിരെ തത്സമയം ശിക്ഷാ നടപടികള്‍ സ്വീകരിച്ചു. 23 പേര്‍ക്കെതിരെ ശിക്ഷാ നടപടികള്‍ സ്വീകരിച്ചുവരികയുമാണ്.

പിടികൂടിയവരില്‍ ഇതിനകം 4,59,229 നിയമ ലംഘകരെ സ്വദേശങ്ങളിലേക്ക് നാടുകടത്തിയിട്ടുണ്ട്. കൂടാതെ, 2,97,156 പേര്‍ക്കെതിരെ ശിക്ഷാ നടപടികള്‍ സ്വീകരിക്കുകയും ചെയ്തിട്ടുണ്ട്. ഇതിനിടെ, അതിര്‍ത്തികള്‍ വഴി അനധികൃത രീതിയില്‍ വിദേശങ്ങളിലേക്ക് രക്ഷപ്പെടുന്നതിന് ശ്രമിച്ച 1,455 പേരും സുരക്ഷാ വകുപ്പുകളുടെ പിടിയിലായി. നിലവില്‍ 12,844 നിയമ ലംഘകരെ നിയമാനുസൃത നടപടികള്‍ക്ക് വിധേരയാക്കിവരികയാണ്. ഇക്കൂട്ടത്തില്‍ 11,245 പേര്‍ പുരുഷന്മാരും 1,599 പേര്‍ വനിതകളുമാണ്.