റിയാദ്: ഇന്ത്യന്‍ ചീഫ് ഓഫ് ആര്‍മി സ്റ്റാഫ് ജനറല്‍ എം എം നരവാനെ ഗൾഫിലെ പ്രമുഖ രാജ്യങ്ങളിൽ സന്ദർശനത്തിനെത്തുന്നു. യുഎഇ സന്ദർശന ശേഷം ഈ മാസം 13, 14 തീയതികളിൽ സഊദിയിൽ മുതിർന്ന ഉദ്യോഗസ്ഥരുമായി ഔദ്യോഗിക കൂടിക്കാഴ്ച നടത്തും. ആദ്യമായാണ് ഇന്ത്യന്‍ ആര്‍മി മേധാവി യുഎഇയും സഊദി അറേബ്യയും സന്ദര്‍ശിക്കുന്നത്. അതു കൊണ്ടു തന്നെ സന്ദര്‍ശനം ചരിത്രപരമായ നാഴികക്കല്ലായിരിക്കും എന്നാണ് വിലയിരുത്തപ്പെടുന്നത്. ആറ് ദിവസത്തെ പര്യടനത്തിനായി നാളെ അദ്ദേഹം യുഎഇ യിലേക്ക് തിരിക്കും.

     അടുത്ത കാലത്തായി പ്രതിരോധ, സുരക്ഷാ സഹകരണവും പ്രത്യേകിച്ച് ഭീകരവാദത്തിനെതിരായ പ്രവർത്തനങ്ങളും വിവിധ രാജ്യങ്ങളുമായി ഇന്ത്യ വിപുലീകരിച്ചിട്ടുണ്ട്. ഇതിന്റെ ഭാഗമായാണ് സന്ദർശനം.
ദ്വിദിന സന്ദര്‍ശനത്തില്‍ സഊദിയിലെ മുതിര്‍ന്ന സുരക്ഷാ ഉദ്യോഗസ്ഥരുമായി കൂടിക്കാഴ്ച നടത്തും. ഇരു രാജ്യങ്ങളും തമ്മിലുള്ള പ്രതിരോധ സഹകരണം കൂടുതല്‍ ഊഷ്മളമാക്കുന്നതിനുളള ചര്‍ച്ചകളാണ് മുഖ്യ അജണ്ട. പ്രതിരോധവുമായി ബന്ധപ്പെട്ട വിവിധ വിഷയങ്ങളും സ്ഥാപനങ്ങള്‍ തമ്മിലുളള സഹകരണവും ചര്‍ച്ചയില്‍ വിഷയമാകും.

     റോയല്‍ സഊദി ലാന്‍ഡ് ഫോഴ്‌സ് ആസ്ഥാനം, ജോയിന്റ് ഫോഴ്‌സ് കമാന്‍ഡ് ഹെഡ്ക്വാര്‍ട്ടേഴ്‌സ്, കിംഗ് അബ്ദുല്‍ അസീസ് മിലിട്ടറി അക്കാദമി എന്നിവ സന്ദര്‍ശിക്കും. നാഷണല്‍ ഡിഫന്‍സ് യൂണിവേഴ്‌സിറ്റി സന്ദര്‍ശനം നടത്തുന്ന എം എം നരവാനെ വിദ്യാര്‍ത്ഥികളെയും ഫാക്കല്‍റ്റികളെയും അഭിസംബോധന ചെയ്യും.

      ഇന്ത്യൻ വിദേശ കാര്യ ജയശങ്കർ മന്ത്രി അടുത്തിടെ യുഎഇ, ബഹ്‌റൈൻ എന്നീ അറബ് രാജ്യങ്ങൾ സന്ദർശിച്ചിരുന്നു .ഇതിന്റെ തുടർച്ചയായാണ് ഇന്ത്യൻ ആർമി ചീഫിന്റെ സന്ദർശനം. ആദ്യ കേന്ദ്രമായ യുഎഇയിൽ നാളെയെത്തുന്ന നരവാനെ പതിനാലിന് സഊദി സന്ദർശത്തിനു ശേഷമാണ് ഇന്ത്യയിലേക്ക് തിരിക്കുക.