കണ്ണൂര്‍: യു.ഡി.എഫിന്റേത് അവസരവാദ രാഷ്ട്രീയമാണെന്നും വ്യക്തതയുള്ള രാഷ്ട്രീയ കാഴ്ചപ്പാടില്ലാത്തതാണ് അവരുടെ ദൗര്‍ബല്യമെന്നും സി.പി.എം സംസ്ഥാന സെക്രട്ടറി എ. വിജയരാഘവന്‍. യു.ഡി.എഫ് അത്യഗാധമായ പ്രതിസന്ധിയാണു നേരിടുന്നത്. ബി.ജെ.പിയിലേക്കു പാലംകെട്ടാന്‍ പല നേതാക്കളും തുടങ്ങിയ ശ്രമങ്ങള്‍ കോണ്‍ഗ്രസിനെ നാശത്തിലേക്കു നയിക്കുമെന്നും പ്രസ്‌ക്ലബിന്റെ 'തദ്ദേശ പോര്' പരിപാടിയില്‍ അദ്ദേഹം പറഞ്ഞു.

സമീപകാലത്ത് യു.ഡി.എഫും സംഘ്പരിവാറും ഒരുപോലെ അക്രമത്തിന്റെ പാതയിലാണ്. ജമാഅത്തെ ഇസ്‌ലാമിയുമായി യു.ഡി.എഫ് സഖ്യമുണ്ടാക്കിയതു ബി.ജെ.പിക്കാണു ഗുണകരമാവുക.  ആ സംഘടനയുടെ എന്തുമാറ്റം കണ്ടാണ് കൂട്ടുകെട്ടുണ്ടാക്കിയതെന്നു യു.ഡി.എഫ് നേതൃത്വം വ്യക്തമാക്കണമെന്നും  വിജയരാഘവന്‍ പറഞ്ഞു.

മുഖ്യമന്ത്രി പ്രചാരണത്തിനിറങ്ങുന്നില്ലെന്ന ചിലരുടെ ആരോപണം അടിസ്ഥാന രഹിതമാണ്.  കൊവിഡ് മാനദണ്ഡങ്ങളുടെ സാങ്കേതിക പരിമിതിയുള്ളതിനാലാണു മുഖ്യമന്ത്രി പൊതുയോഗങ്ങളില്‍ പങ്കെടുക്കാത്തത്. സി.എം രവീന്ദ്രന്‍ ഇ.ഡിക്കു മുന്നില്‍ ഹാജരാകാതിരിക്കുന്നത് ആരോഗ്യപ്രശ്‌നങ്ങള്‍ കാരണമാണ്. അന്വേഷണ ഏജന്‍സിക്കു മുന്നില്‍ ഒളിച്ചോടേണ്ട കാര്യമൊന്നും കമ്യൂണിസ്റ്റുകാര്‍ക്കില്ലെന്നും വിജയരാഘവന്‍ വ്യക്തമാക്കി.