കെയ്‌റോ: ഈജിപ്തില്‍ നടക്കുന്ന ആഫ്രിക്കന്‍ നാഷന്‍സ് കപ്പിന്റെ സെമി ഫൈനല്‍ ലൈനപ്പ് തയാറായി. ക്വാര്‍ട്ടര്‍ ഫൈനല്‍ മത്സരങ്ങള്‍ കഴിഞ്ഞ ദിവസം പൂര്‍ത്തിയായതോടെയാണ് സെമി ചിത്രം തെളിഞ്ഞത്. നാളെ രാത്രി 9.30ന് നടക്കുന്ന ആദ്യ സെമിയില്‍ ലിവര്‍പൂള്‍ താരം സാദിയോ മാനെ നയിക്കുന്ന സെനഗലും തുണീഷ്യയും തമ്മില്‍ ഏറ്റുമുട്ടും. ക്വാര്‍ട്ടര്‍ ഫൈനല്‍ പോരാട്ടത്തില്‍ ബെനിനെ എതിരില്ലാത്ത ഒരു ഗോളിന് തകര്‍ത്തായിരുന്നു സെനഗല്‍ സെമിയില്‍ പ്രവേശിച്ചത്. 82-ാം മിനുട്ടില്‍ മാനെയുടെ അസിസ്റ്റില്‍ നിന്ന് ഇദ്‌രീസയായിരുന്നു സെനഗലിന്റെ വിജയഗോള്‍ നേടിയത്.
16-ാം തവണ ആഫ്രിക്കന്‍ നാഷന്‍സ് കപ്പിനെത്തുന്ന സെനഗല്‍ കിരീടം മോഹിച്ചാണ് എത്തിയിട്ടുള്ളത്. 2002ല്‍ ഫൈനലില്‍ കാമറൂണിനോട് പരാജയപ്പെട്ട് നഷ്ടപ്പെട്ട കിരീടം തിരിച്ച് പിടിക്കാനുള്ള ഒരുക്കത്തിലാണ് മാനെയും സംഘവും. കഴിഞ്ഞ ദിവസം നടന്ന അവസാന ക്വാര്‍ട്ടര്‍ മത്സരത്തില്‍ മഡഗാസ്‌ക്കറിനെ എതിരില്ലാത്ത മൂന്ന് ഗോളിന് തകര്‍ത്തായിരുന്നു തുണീഷ്യ സെമിയിലെത്തിയത്. രണ്ടാം പകുതിയിലായിരുന്നു തുണീഷ്യ മൂന്ന് ഗോളുകളും സ്വന്തമാക്കിയത്. 2011ന് ശേഷം ആഫ്രിക്കന്‍ നാഷന്‍സ് കപ്പിനെത്തിയ തുണീഷ്യയുടെ മൂന്നാം ആഫ്രിക്കന്‍ ചാംപ്യന്‍ഷിപ്പാണ്.
2011ല്‍ സുഡാനില്‍ നടന്ന ചാംപ്യന്‍ഷിപ്പില്‍ അങ്കോളയെ തകര്‍ത്തായിരുന്നു തുണീഷ്യ ചാംപ്യന്‍മാരായത്. രണ്ടാം സെമിയില്‍ അള്‍ജീരിയയും നൈജീരിയയും തമ്മില്‍ ഏറ്റുമുട്ടും. ദക്ഷിണാഫ്രിക്കയെ 2-1 എന്ന സ്‌കോറിന് തകര്‍ത്ത് നൈജീരിയ സെമിയിലേക്ക് ടിക്കറ്റ് നേടിയപ്പോള്‍ ഐവറി കോസ്റ്റിനെ പെനാല്‍റ്റി ഷൂട്ടൗട്ടില്‍ മുട്ടുകുത്തിച്ചായിരുന്നു അള്‍ജീരിയ സെമിയിലെത്തിയത്. രാത്രി 12.30നാണ് രണ്ടാം സെമി ഫൈനല്‍.