സിദ്ധാപുരം: അനധികൃത പുകയില ഉത്പന്നങ്ങളുടെ വില്‍പനയ്‌ക്കെതിരേ കുടകില്‍ പരിശോധന ശക്തമാക്കി.
2003ല്‍ നിലവില്‍വന്ന കോട്പാ നിയമ പ്രകാരം ആയിരത്തിലധികം കേസുകള്‍ രജിസ്റ്റര്‍ ചെയ്തു. കുടകിലെ ഓരോ പൊലിസ് സ്റ്റേഷന്‍ പരിധിയിലും നഗരങ്ങളിലും രണ്ടാഴ്ചയായി കനത്ത പരിശോധന നടന്നുവരികയാണ്. വിരാജ്‌പേട്ടയില്‍ നിന്നു കഴിഞ്ഞദിവസം 22,000 രൂപയുടെ പുകയില ഉല്‍പന്നങ്ങള്‍ പിടിച്ചെടുത്തിരുന്നു. കുശാല്‍നഗര്‍ ഉള്‍പ്പെടെ പത്തോളം സ്ഥലങ്ങളില്‍ പ്രത്യേക സ്‌ക്വാഡും പൊലിസും പരിശോധന നടത്തി ഉല്‍പന്നങ്ങള്‍ പിടിച്ചെടുത്തു. ഇന്നലെ സിദ്ധാപുരത്തും പരിശോധന നടന്നു.
സിഗരറ്റ് ഉള്‍പ്പെടെയുള്ള പുകയില ഉത്പന്നങ്ങളുടെ പൊതുനിരത്തുകളിലെ വില്‍പനയും ഉപയോഗവുമാണ് തടയുന്നത്. നിയമം മറികടക്കുന്നവരില്‍ നിന്നു 200 രൂപയാണ് പിഴയീടാക്കുന്നത്.
കോട്പാ നിയമപ്രകാരം ഈ കുറ്റത്തിന് തടവുശിക്ഷയും ലഭിക്കാനും സാധ്യതയുണ്ട്. എല്ലാ കടകളിലും പ്രധാന കവാടങ്ങളിലും പുകയില നിരോധന ബോര്‍ഡും സ്ഥാപിക്കാന്‍ കര്‍ശന നിര്‍ദേശവും നല്‍കുന്നുണ്ട്.