മലപ്പുറം: സ്‌കൂള്‍ വിക്കിയില്‍ ഏറ്റവും മികച്ച രീതിയില്‍ വിവരങ്ങള്‍ നല്‍കുന്ന സ്‌കൂളുകള്‍ക്ക് പൊതുവിദ്യാഭ്യാസ വകുപ്പിന് കീഴിലുളള കേരളാ ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) നല്‍കുന്ന ശബരീഷ് സ്മാരക പുരസ്‌കാരങ്ങള്‍ പ്രഖ്യാപിച്ചു. സംസ്ഥാനത്തെ ഏറ്റവും മികച്ച സ്‌കൂളായി ജി.എച്ച്.എസ്.എസ് അരീക്കോടിനെ തെരഞ്ഞെടുത്തു. ഒരു ലക്ഷം രൂപയും ട്രോഫിയും പ്രശംസാപത്രവും അടങ്ങുന്നതാണ് അവാര്‍ഡ്.
ജില്ലയിലെ ഏറ്റവും മികച്ച സ്‌കൂളിനുള്ള അവാര്‍ഡ് കടുങ്ങപുരം ജി.എച്ച്.എസ് സ്‌കൂളിനാണ്. ജി.എം.യു.പി.എസ് കാളികാവ് ബസാറിനാണ് രണ്ടാം സ്ഥാനം.
2017 മുതല്‍ അരീക്കോട് സ്‌കൂളിന്റെ കലോത്സവങ്ങളിലെ മുഴുവന്‍ രചനാ മത്സരങ്ങളുടെ സൃഷ്ടികളും സ്‌കൂള്‍ വിക്കിയില്‍ ലഭ്യമാക്കി വരുന്നുണ്ട്. സ്‌കൂളിന്റെ വിവരങ്ങള്‍, ചരിത്രം, പ്രമുഖരായ പൂര്‍വ വിദ്യാര്‍ഥികള്‍, സ്‌കൂള്‍ മാപ്പ്, വിവിധ ക്ലബുകള്‍ തുടങ്ങിയവ ഉള്‍പ്പെടെ സ്‌കൂള്‍ വിക്കിയില്‍ ലഭ്യമാണ്. നിലവില്‍ 26952 പേര്‍ അംഗത്വമെടുത്തിട്ടുള്ള സ്‌കൂള്‍ വിക്കിയില്‍ 16047 ലേഖനങ്ങളുണ്ട്. 2010ലെ സ്റ്റോക്‌ഹോം ചലഞ്ച് അവാര്‍ഡ്, 2017ലെ സോഷ്യല്‍ മീഡിയ ഫോര്‍ എംപവര്‍മെന്റ് അവാര്‍ഡ് തുടങ്ങിയ പുരസ്‌കാരങ്ങളും സ്‌കൂള്‍ വിക്കിക്ക് ലഭിച്ചിട്ടുണ്ട്.
അവാര്‍ഡുകള്‍ നാലിന് മലപ്പുറത്ത് നടക്കുന്ന ചടങ്ങില്‍ വിദ്യാഭ്യാസ വകുപ്പ് മന്ത്രി പ്രൊഫ. സി. രവീന്ദ്രനാഥ് വിതരണം ചെയ്യുമെന്ന് കൈറ്റ് വൈസ് ചെയര്‍മാന്‍ കെ. അന്‍വര്‍ സാദത്ത് അറിയിച്ചു. സമ്മാനാര്‍ഹരായ സ്‌കൂളുകളുടെ പട്ടികയും പേജുകളും www.schoolwiki.in ല്‍ ലഭ്യമാണ്.