കൊച്ചി: സി.പി.ഐ സംസ്ഥാന സെക്രട്ടറി കാനം രാജേന്ദ്രനെതിരേ വിമര്‍ശനവുമായി സി.പി.എം. എറണാകുളം ജില്ലാ കമ്മിറ്റി രംഗത്ത്. കാനം രാജേന്ദ്രന്‍ ഇടത് ഐക്യം ദുര്‍ബലപ്പെടുത്താന്‍ ശ്രമിക്കുന്നുവെന്നും വര്‍ഗശത്രുക്കള്‍ക്ക് വിടുപണി ചെയ്യുന്നവരെ കൂടെക്കൂട്ടിയെന്നും സി.പി.എം വിമര്‍ശിച്ചു.
കമ്മ്യൂണിസ്റ്റ് പാര്‍ട്ടിയില്‍ നിന്നും വിട്ടുവരുന്നവരെ ബി.ജെ.പിയിലേക്കോ കോണ്‍ഗ്രസ്സിലേക്കോ ആട്ടിയോടിക്കാന്‍ സി.പി.ഐ തയ്യാറല്ലെന്നും കഴിഞ്ഞദിവസം കാനം പറഞ്ഞിരുന്നു. എറണാകുളത്ത് സി.പി.എം ഉപേക്ഷിച്ച് സി.പി.ഐ അംഗത്വം സ്വീകരിച്ചവരെ പാര്‍ട്ടിയിലേക്ക് സ്വീകരിക്കുന്ന സമ്മേളനത്തില്‍ പ്രസംഗിക്കുമ്പോഴായിരുന്നു കാനത്തിന്റെ പരാമര്‍ശം.

വിഭാഗീയ പ്രവര്‍ത്തനം നടത്തിയതിനാണ് ചിലരെ പാര്‍ട്ടിയില്‍ നിന്ന് പുറത്താക്കിയിരുന്നു. ഇത്തരക്കാരെ കൂട്ടി ഇടതുപക്ഷം ശക്തിപ്പെടുത്തുന്നുവെന്ന് പറയുന്ന വാദം വിചിത്രമാണെന്ന് ജില്ലാ കമ്മിറ്റി ചൂണ്ടിക്കാട്ടി. ഇടതുപക്ഷ ഐക്യത്തെ തകര്‍ക്കാനാണ് കാനം ശ്രമിക്കുന്നത്. സങ്കുചിത താല്‍പ്പര്യങ്ങളുള്ളവരെയും സി.പി.എം വിരുദ്ധ പ്രവര്‍ത്തനം നടത്തുന്നവരെയും സി.പി.ഐയിലേക്ക് കൊണ്ടുവരുന്നതിലൂടെ ഐക്യമുണ്ടാക്കാന്‍ സാധിക്കില്ലെന്നും നേതാക്കള്‍ പറഞ്ഞു. ഉദയംപേരൂരിലെ വിമതരെ സി.പി.ഐയില്‍ ചേര്‍ത്തതിനെതിരെയാണ് സി.പി.എമ്മിന്റെ പ്രതിഷേധം.