തിരുവനന്തപുരം: കേരളത്തിലെ പ്രളയനാന്തര പുനര്‍നിര്‍മാണത്തിനു ലോകബാങ്ക് വികസന പങ്കാളിയാകുമെന്ന് അറിയിച്ചിട്ടുണ്ടെന്ന് മുഖ്യമന്ത്രി പിണറായി വിജയന്‍. സര്‍ക്കാര്‍ ഇന്നലെ കോവളത്ത് സംഘടിപ്പിച്ച രാജ്യാന്തര വികസന സംഗമത്തില്‍ ലോകബാങ്ക് കണ്‍ട്രി മാനേജര്‍ ജുനൈദ് അഹമ്മദാണ് ഈ പ്രഖ്യാപനം നടത്തിയത്.
ലോകബാങ്ക് വികസന പങ്കാളിത്തം നല്‍കുന്ന രാജ്യാന്തര സംസ്ഥാനം എന്ന നിലയില്‍ കേരളം ഉയരുകയാണെന്നും മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു. സാധാരണയുള്ള പദ്ധതിപങ്കാളികള്‍ എന്നതിലുപരി വികസന പങ്കാളി എന്ന നിലയിലാണ് ലോകബാങ്ക് കേരളത്തിന്റെ പുനര്‍നിര്‍മാണത്തിനു സഹായിക്കാമെന്ന് അറിയിച്ചിട്ടുള്ളത്. അടുത്ത കാലത്തൊന്നും ലോകബാങ്ക് സ്വീകരിക്കാത്ത രീതിയാണിത്. വികസന സംഗമത്തില്‍ പങ്കെടുത്ത രാജ്യാന്തര ഏജന്‍സികളായ എ.ഡി.ബി, ജെ.ഐ.സി.എ, കെ.എഫ്.ഡബ്ല്യു, ന്യൂ ഡെവലപ്പ്‌മെന്റ് ബാങ്ക് എന്നിവരും പുനര്‍നിര്‍മാണത്തിനുള്ള സഹായം വാഗ്ദാനം ചെയ്തിട്ടുണ്ടെന്നും മുഖ്യമന്ത്രി പറഞ്ഞു.
നഗരങ്ങളിലെ ജലവിതരണത്തിനും റോഡുകള്‍ക്കും അടക്കം സഹായം നല്‍കാമെന്ന് നബാര്‍ഡ്, ഹഡ്‌കോ എന്നീ ഏജന്‍സികള്‍ അറിയിച്ചു. ടാറ്റ ട്രസ്റ്റ്, ബില്‍ ആന്‍ഡ് മെലിന്‍ഡ ഗേറ്റ്‌സ് ഫൗണ്ടേഷന്‍, ഐ.എഫ്.ഡി.സി ഫൗണ്ടേഷന്‍ എന്നിവയും പ്രത്യേകം തീരുമാനിക്കുന്ന പദ്ധതികള്‍ക്ക് സഹായം നല്‍കാമെന്നും വിവിധ വകുപ്പുകളുടെ കാര്യക്ഷമത ശക്തിപ്പെടുത്തുന്നതിനു പിന്തുണ നല്‍കാമെന്നും അറിയിച്ചു.
സര്‍ക്കാര്‍തലത്തില്‍ നേതൃപരമായി കൈക്കൊള്ളുന്ന നടപടികളും റീബില്‍ഡ് കേരള പദ്ധതി വഴി നടത്താനുദ്ദേശിക്കുന്ന വികസന ഇടപെടലുകളും സംബന്ധിച്ചാണ് മുഖ്യമന്ത്രി എന്ന നിലയില്‍ സംസാരിച്ചത്.
ദീര്‍ഘകാല വികസന പദ്ധതിയായ 'റീബില്‍ഡ് കേരള' വഴി അടിസ്ഥാനപരമായ പരിഷ്‌കാരങ്ങളും നൂതനമായ സമീപനവും ഉള്‍ച്ചേര്‍ന്ന വികസന കാഴ്ചപ്പാടാണ് മുന്നോട്ടുവയ്ക്കുന്നതെന്നും മുഖ്യമന്ത്രി പറഞ്ഞു.