ഹൈദരാബാദ്: ഐ.പി.എല്‍ കിരീട മോഹവുമായി നടക്കുന്ന സണ്‍ റൈസേഴ്‌സ് ഹൈദരാബാദ് ഒരുക്കങ്ങള്‍ തുടങ്ങി. ലോകകപ്പ് കിരീടം സ്വന്തമാക്കാന്‍ ഇംഗ്ലണ്ടിനെ സഹായിച്ച പരിശീലകന്‍ ട്രവര്‍ ബെയ്‌ലിസിനെയാണ് ഹൈദരാബാദ് പരിശീലകനായി നിയമിച്ചിട്ടുള്ളത്.
കഴിഞ്ഞ സീസണില്‍ മികച്ച പ്രകടനം നടത്തിയിരുന്നെങ്കിലും സണ്‍ റൈസേഴ്‌സിന് കിരീടം നേടാന്‍ കഴിഞ്ഞിരുന്നില്ല. പുതിയ സീസണില്‍ കിരീട ലക്ഷ്യത്തോടെയാണ് ഏറ്റവും മികച്ച പരിശീലകനെ തന്നെ എത്തിച്ചിരിക്കുന്നത്. ഏഴ് വര്‍ഷമായി ഹൈദരാബാദിനെ പരിശീലിപ്പിച്ചിരുന്ന ടോം മൂഡിയുടെ സ്ഥാനത്തേക്കാണ് പുതിയ പരിശീലകനെ എത്തിക്കുന്നത്.
ബെയ്‌ലിസ് ഐ.പി.എല്ലില്‍ എത്തുന്നത് ഇതാദ്യമല്ല. നേരത്തെ കൊല്‍ക്കത്ത ടീമിന്റെ പരിശീലകനായിരുന്ന അദ്ദേഹം പിന്നീടായിരുന്നു ഇംഗ്ലണ്ടിനൊപ്പം ചേര്‍ന്നത്. ടീമിന് പുതിയ പരിശീലകനെ നിയമിക്കുകയാണെന്നും ബെയ്‌ലിസ് അനുയോജ്യനാണെന്നും ടീം മാനേജ്‌മെന്റ് അറിയിച്ചു.
രണ്ടുതവണ കൊല്‍ക്കത്തയ്ക്ക് കിരീടം നേടിക്കൊടുത്ത പരിശീലകനാണ് ട്രവര്‍ ബെയ്‌ലിസ്.