അശ്‌റഫ് കൊണ്ടോട്ടി

കൊണ്ടോട്ടി: കേരളത്തിലെ രണ്ട് എംബാര്‍ക്കേഷന്‍ പോയിന്റുകളില്‍ നിന്ന് ഒരേ സമയത്തുള്ള ഹജ്ജ് സര്‍വിസുകള്‍ സംസ്ഥാന ഹജ്ജ് കമ്മിറ്റിക്ക് അധിക സാമ്പത്തിക ബാധ്യതയുണ്ടാക്കുന്നു. ഈ വര്‍ഷം മുതലാണ് ഹജ്ജ് സര്‍വിസുകള്‍ കരിപ്പൂരിലും നെടുമ്പാശ്ശേരിയിലുമുണ്ടായത്. രണ്ടിടങ്ങളിലും ഒരേ സമയത്ത് തന്നെ സര്‍വിസ് നടത്തേണ്ടി വന്നതിനാലാണ് ഹജ്ജ് കമ്മിറ്റിക്ക് ചെലവേറിയത്. ഇതിന് പുറമെ സംഘാടകര്‍ക്കും ഇത് ബുദ്ധിമുട്ടുണ്ടാക്കുന്നുണ്ട്.
ഇന്ത്യയില്‍ ഹജ്ജ് സര്‍വിസുകള്‍ രണ്ടുഘട്ടങ്ങളിലാണ് നടക്കാറുള്ളത്. രണ്ടു ഘട്ടങ്ങളിലായി രണ്ട് എംബാര്‍ക്കേഷന്‍ പോയിന്റുകളില്‍ നിന്ന് സര്‍വിസ് നടത്താന്‍ അനുമതി ലഭിച്ചാല്‍ ചെലവുകള്‍ കുറക്കാനാകുമെന്ന് സംസ്ഥാന ഹജ്ജ് കമ്മിറ്റി ചെയര്‍മാന്‍ സി. മുഹമ്മദ് ഫൈസിയും ക്യാംപ് കണ്‍വീനര്‍ പി. അബ്ദുറഹിമാനും പറഞ്ഞു. ഹജ്ജ് ഹൗസിലെ പ്രയോജനപ്രദമായ വസ്തുക്കള്‍ നെടുമ്പാശ്ശേരിയിലെത്തിക്കുന്നത് വഴി വാടക കുറക്കാനാകും. ഒരേസമയത്ത് നടക്കുമ്പോള്‍ ഇതിന് സാധിക്കുന്നില്ല.
ഹജ്ജ് ആദ്യഘട്ടം കഴിഞ്ഞ് രണ്ട് ദിവസം കഴിഞ്ഞാണ് രണ്ടാംഘട്ടം ആരംഭിക്കുന്നത്. ഒരു എംബാര്‍ക്കേഷന്‍ പോയിന്റ് രണ്ടാംഘട്ടത്തിലാക്കുമ്പോള്‍ അവസാന ദിവസങ്ങളില്‍ അവസരം കൈവരുന്നവര്‍ക്ക് വരെ പ്രയോജനപ്പെടും. നിലവിലെ ആവശ്യം സംസ്ഥാന സര്‍ക്കാര്‍ മുഖേനയും ഹജ്ജ് കമ്മിറ്റി വഴിയും കേന്ദ്രത്തെ അറിയിക്കും.