ന്യൂഡല്‍ഹി: ഇന്ത്യയുടെ 46-മത്തെ ചീഫ്ജസ്റ്റിസായി രഞ്ജന്‍ ഗോഗോയ് സത്യപ്രതിജ്ഞചൊല്ലി അധികാരമേറ്റു. ബുധനാഴ്ച രാവിലെ 11 മണിക്ക് രാഷ്ട്രപതി ഭവനിലെ ദര്‍ബാര്‍ ഹാളില്‍ നടന്ന ചടങ്ങില്‍ രാഷ്ട്രപതി രാംനാഥ് കോവിന്ദാണ് സത്യവാചകം ചൊല്ലിക്കൊടുത്തത്.

ചടങ്ങുകള്‍ക്കു ശേഷം കോടതിയിലേക്കു പോയ ഗോഗോയ്, 12 മണിയോടെ ചീഫ്ജസ്റ്റിസിന്റെ ഒന്നാം നമ്പര്‍ കോടതി മുറിയില്‍ ഇരുന്ന് കേസ് നടപടികളില്‍ പങ്കെടുത്തു. അടുത്തവര്‍ഷം നവംബര്‍ 17ന് 64 കാരനായ ഗോഗോയിയുടെ കാലാവധി അവസാനിക്കും. 1982ല്‍ രണ്ടുമാസക്കാലം അസം മുഖ്യമന്ത്രിയായ കോണ്‍ഗ്രസ് നേതാവ് കേശവ് ചന്ദ്ര ഗോഗോയിയുടെ മകനാണ് രഞ്ജന്‍ ഗോഗോയ്.

ഒരേസമയം കൈയടിയും വിമര്‍ശനവും ഏറ്റുവാങ്ങുകയും പത്രസമ്മേളനത്തിലൂടെ മുതിര്‍ന്ന ജഡ്ജിമാരുടെ പരസ്യ ആരോപണങ്ങള്‍ക്കു വിധേയനാവുകയുംചെയ്ത ചീഫ് ജസ്റ്റിസ് ദീപക്മിശ്രയുടെ കാലാവധി ചൊവ്വാഴ്ച അവസാനിച്ച ഒഴിവിലേക്കാണ് ഗോഗോയിയുടെ നിയമനം. രാജ്യത്തിന്റെ വടക്കുകിഴക്കന്‍ സംസ്ഥാനങ്ങളില്‍ നിന്നുള്ള ആദ്യ ചീഫ് ജസ്റ്റിസായ ഗോഗോയിയെ കഴിഞ്ഞമാസം 13നാണ് ആ പദവിയിലേക്കു രാഷ്ട്രപതി നിയമിച്ച് ഉത്തരവിട്ടത്.

ദീപക് മിശ്രയുടെ ഒഴിവിലേക്ക് ജഡ്ജിമാരുടെ നിയമനത്തിന് അധികാരമുള്ള മുതിര്‍ന്ന അഞ്ചു ജഡ്ജിമാരടങ്ങുന്ന കൊളീജിയത്തില്‍ ജസ്റ്റിസ് എസ്.എ ബോബ്‌ഡെ എത്തി. ജസ്റ്റിസ് ഗോഗോയിക്കു ശേഷം ബോബ്‌ഡെയാവും ചീഫ് ജസ്റ്റിസ്.