കൊല്ലം: പാരിപ്പള്ളി യു.കെ.എഫ്. എന്‍ജിനീയറിങ് കോളജില്‍ പുതുതായി സ്ഥാപിച്ച 60 കിലോവാട്ട് ശേഷിയുള്ള സോളാര്‍ പവര്‍പ്ലാന്റിന്റെ പ്രവര്‍ത്തനോദ്ഘാടനവും കെ.എസ്.ഇ.ബിക്ക് സമര്‍പണവും നാളെ രാവിലെ 10നു മന്ത്രി ജെ. മേഴ്‌സിക്കുട്ടിയമ്മ നിര്‍വഹിക്കും. പൂര്‍ണമായും സോളാര്‍ പവറില്‍ പ്രവര്‍ത്തിക്കുന്ന കോളജ് എന്ന ബഹുമതി യു.കെ.എഫിന് ലഭിക്കും. ജി.എസ്. ജയലാല്‍ എം.എല്‍.എ. അധ്യക്ഷനാകുന്ന യോഗത്തില്‍ യു.കെ.എഫ്. വിദ്യാര്‍ഥി ക്ഷേമനിധിയില്‍നിന്നും നിര്‍ധനായ ഒരു വിദ്യാര്‍ഥിക്കു വീട് നിര്‍മിക്കാനായി അഞ്ചുലക്ഷം രൂപ മന്ത്രി കൈമാറും. ബി.ടെക് ബാച്ച് ക്ലാസുകളുടെ ആരംഭം കേരള സ്‌റ്റേറ്റ് ഇന്നോവേഷന്‍ കൗണ്‍സില്‍ ചെയര്‍മാന്‍ രാധാകൃഷ്ണന്‍ നിര്‍വഹിക്കും. സോളാര്‍ പവര്‍ പ്ലാന്റ് പ്രവര്‍ത്തനോദ്ഘാടന ചടങ്ങില്‍ യു.കെ.എഫ്. കോളജ് ചെയര്‍മാന്‍ ഡോ. എസ്. ബസന്ത്, ഡയറക്ടര്‍, ഡെപ്യൂട്ടി ഡയറക്ടര്‍, പ്രിന്‍സിപ്പല്‍ തുടങ്ങിയവര്‍ പങ്കെടുക്കും. വാര്‍ത്താ സമ്മേളനത്തില്‍ ഡയറക്ടര്‍ അമൃതാ പ്രശോഭ്, പി.ടി.എ. പ്രസിഡന്റ് എ. സുന്ദരേശന്‍, വിവേക്, അജീഷ് പങ്കെടുത്തു.