പഴയങ്ങാടി: രാഷ്ട്രീയരംഗത്തും പൊതു പ്രവര്‍ത്തനരംഗത്ത് മൂല്യച്യുതികളും പുഴുക്കുത്തുകളുമുള്ള ഇക്കാലത്ത് പൊതുപ്രവര്‍ത്തകര്‍ക്കു മാതൃകയായ നേതാവാണ് മുന്‍മന്ത്രിയും കോണ്‍ഗ്രസ് നേതാവുമായിരുന്ന കെ.പി നൂറുദ്ദീനെന്നു ഡി.സി.സി പ്രസിഡന്റ് സതീശന്‍ പാച്ചേനി.
ഒന്നാം ചരമവാര്‍ഷികത്തോടനുബന്ധിച്ച് കോണ്‍ഗ്രസ് മാടായി മണ്ഡലം കമ്മിറ്റി പുതിയങ്ങാടി പുതിയവളപ്പില്‍ നടത്തിയ കെ.പി നൂറുദ്ദീന്‍ അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം.
സുധീര്‍ വെങ്ങര അധ്യക്ഷനായി. എം. നാരായണന്‍കുട്ടി, എം.പി ഉണ്ണികൃഷ്ണന്‍, അന്‍സാരി തില്ലങ്കേരി , എം.കെ രാജന്‍, എന്‍. നാരായണന്‍, കെ.വി രാമചന്ദ്രന്‍, കെ. ബ്രിജേഷ് കുമാര്‍, നൗഷാദ് വാഴവളപ്പില്‍, അജിത്ത് മാട്ടൂല്‍, പി.പി കരുണാകരന്‍, പി.എം ഹനീഫ്, എ.പി ബദറുദീന്‍, സജി നാരായണന്‍, എം. ചന്ദ്രന്‍ സംസാരിച്ചു.