കോഴിക്കോട്: ബ്രൂവറി അഴിമതിയില്‍ ജുഡിഷ്യല്‍ അന്വേഷണം നടത്തുക, എക്‌സൈസ് മന്ത്രി ടി.പി രാമകൃഷ്ണന്‍ രാജി വയ്ക്കുക എന്നീ ആവശ്യങ്ങളുന്നയിച്ച് യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തില്‍ ഡെപ്യൂട്ടി എക്‌സൈസ് കമ്മിഷണറുടെ ഓഫിസിലേക്ക് നടത്തിയ മാര്‍ച്ച് സംഘര്‍ഷഭരിതമായി.
ഇന്നലെ രാവിലെ പതിനൊന്നരയോടെ കോഴിക്കോട് കലക്ടറേറ്റിലെ ഒന്നാം ഗേറ്റിലാണ് സംഭവം. എരഞ്ഞിപ്പാലത്തു നിന്ന് പ്രകടനവുമായി എത്തിയ പ്രവര്‍ത്തകര്‍ എക്‌സൈസ് ഡെപ്യൂട്ടി കമ്മിഷണര്‍ ഓഫിസിലേക്ക് തള്ളിക്കയറാന്‍ ശ്രമിച്ചതോടെ പൊലിസ് ജലപീരങ്കി പ്രയോഗിക്കുകയായിരുന്നു. തുടര്‍ന്ന് അല്‍പ നേരത്തെ പ്രതിരോധത്തിനു ശേഷം മാര്‍ച്ച് കെ.പി.സി.സി ജനറല്‍ സെക്രട്ടറി എന്‍. സുബ്രഹ്മണ്യന്‍ ഉദ്ഘാടനം ചെയ്തു. ഇതിനുശേഷം പ്രവര്‍ത്തകര്‍ വീണ്ടും ബാരിക്കേഡ് തള്ളി അകത്തേക്ക് കടക്കാന്‍ ശ്രമിച്ചതോടെ പൊലിസ് ജലപീരങ്കി പ്രയോഗിച്ചു. തുടര്‍ന്ന് ഗേറ്റിനുമുന്നില്‍ കുത്തിയിരുന്ന പ്രവര്‍ത്തകരെ പൊലിസ് ബലം പ്രയോഗിച്ച് അറസ്റ്റ്‌ചെയ്ത് വാനിലേക്ക് കയറ്റുന്നതിനിടെ സംഘര്‍ഷമുണ്ടാവുകയും പൊലിസ് ലാത്തിച്ചാര്‍ജ് നടത്തുകയുമായിരുന്നു. ലാത്തിയടിയില്‍ നിരവധി പ്രവര്‍ത്തകര്‍ക്ക് പരുക്കേറ്റു. പാര്‍ലമെന്റ് മണ്ഡലം ജനറല്‍ സെക്രട്ടറി പി.വി ഷംജിത്ത്, ജനറല്‍ സെക്രട്ടറി ബിജിത്ത് ബിലാക്കാട്ട്, യൂത്ത് കോണ്‍ഗ്രസ് കുന്ദമംഗലം നിയോജക മണ്ഡലം ജനറല്‍ സെക്രട്ടറി രാഗേഷ് ഒളവണ്ണ, എലത്തൂര്‍ നിയോജക മണ്ഡലം ജനറല്‍ സെക്രട്ടറി സത്യന്‍ പുതിയാപ്പ, ബാലുശേരി നിയോജകമണ്ഡലം ജനറല്‍ സെക്രട്ടറി ശ്രീനാഥ് ഉള്ള്യേരി, ആര്‍. ഷഹിന്‍, വി.ടി നിഹാല്‍, രാജേഷ് കാരപ്പറമ്പ്, ജവഹര്‍ പൂമംഗലം എന്നിവര്‍ക്കാണ് പരുക്കേറ്റത്. കസ്റ്റഡിയിലെടുത്ത ഇവരെ പിന്നീട് ആശുപത്രിയിലേക്ക് മാറ്റുകയായിരുന്നു. സി.പി.എമ്മിന് മദ്യത്തിന്റെ മേഖലയും ലോബികളും എന്നും വരുമാനമായിരുന്നുവെന്ന് എന്‍. സുബ്രഹ്മണ്യന്‍ ഉദ്ഘാടന പ്രസംഗത്തില്‍ പറഞ്ഞു.
വിനോദ് റായി ഉത്തരവിനെ കാറ്റില്‍ പറത്തിയാണ് പുതിയ മദ്യനിര്‍മാണ കേന്ദ്രങ്ങള്‍ക്ക് അനുമതി നല്‍കിയത്. ഇത് ചട്ടലംഘനമാണ്. അഴിമതി നടത്താന്‍ ഉദ്ദേശിച്ചു തന്നെയുള്ള പ്രവൃത്തിയാണിത്. പിണറായി വിജയന്റെ മകളുടെ വിവാഹം നടത്താന്‍ എല്ലാ ഒത്താശയും ചെയ്തയാള്‍ക്കാണ് കണ്ണൂരില്‍ മദ്യനിര്‍മാണ ശാലക്ക് അനുവാദം നല്‍കിയത്.
ലാവ്‌ലിന്‍ കേസില്‍ പ്രതിയായ പിണറായിയില്‍ നിന്നും ഇതുമാത്രമാണ് പ്രതീക്ഷിക്കുന്നതെന്നും സുബ്രഹ്മണ്യന്‍ പറഞ്ഞു. യു.ഡി.എഫ് സര്‍ക്കാര്‍ അടച്ച ബാറുകള്‍ തുറക്കുകയും പുതിയവക്ക് അനുമതി നല്‍കുകയുമാണ് ഇടതു സര്‍ക്കാര്‍ ചെയ്തത്.
എക്‌സൈസ് മന്ത്രി മദ്യവ്യവസായികള്‍ക്ക് എല്ലാ ഒത്താശയും നല്‍കുകയാണ്. നവകേരളമല്ല നുരയ്ക്കുന്ന കേരളമുണ്ടാക്കാനാണ് ഇടതു സര്‍ക്കാറിന്റെ ശ്രമമെന്നും അദ്ദേഹം കൂട്ടിച്ചേര്‍ത്തു. യൂത്ത് കോണ്‍ഗ്രസ് പാര്‍ലമെന്റ് സെക്രട്ടറി ജെയ്‌സല്‍ അത്തോളി അധ്യക്ഷനായി. യൂത്ത് കോണ്‍ഗ്രസ് സംസ്ഥാന ജനറല്‍ ആദം മുല്‍സി നേതൃത്വം നല്‍കി.