ആലപ്പുഴ: പൊതുവിവരാവകാശ ഓഫിസര്‍മാര്‍ കമ്മിഷന്‍ ഹിയറിങില്‍ പങ്കെടുക്കത്തതിനെതിരേ നടപടിയെടുക്കുമെന്ന് വിവരാവകാശ കമ്മിഷണര്‍. പൊലിസുകാരാണ് സ്ഥിരം ഹാജരാകാതിരിക്കുന്നത്. പൊലിസുകാര്‍ വിവരാവകാശ കമ്മിഷനെ നിസാരമായാണ് പരിഗണിക്കുന്നതെന്നും കമ്മിഷണര്‍ കെ.വി സുധാകരന്‍ കുറ്റപ്പെടുത്തി. നൂറനാട് എസ്.ഐ പരാതിക്കാരന് മറുപടി നല്‍കാതിരുന്ന കേസ് ചൂണ്ടിക്കാട്ടുകയായിരുന്നു കമ്മിഷന്‍.
വിഷയം സംസ്ഥാന പൊലിസ് മേധാവിയുടെ ശ്രദ്ധയില്‍പ്പെടുത്തുമെന്നും അദ്ദേഹം പറഞ്ഞു. മാന്നാറില്‍ പൊതുകുളത്തിന്റെ അവകാശം സംബന്ധിച്ചുള്ള തര്‍ക്കത്തില്‍ മാന്നാര്‍ ഗ്രാമപഞ്ചായത്ത് സെക്രട്ടറിയോട് വിശദീകരണം തേടുമെന്നും കമ്മിഷന്‍ പറഞ്ഞു. ആലപ്പുഴ കലക്ടറേറ്റ് കോണ്‍ഫറന്‍സ് ഹാളില്‍ നടന്ന കമ്മിഷന്‍ സിറ്റിങില്‍ 20 പരാതികള്‍ പരിഗണിച്ചു.