ജിദ്ദ: വനിതാ ഹജ്ജ് തീര്‍ഥാടകരുടെ നടപടിക്രമങ്ങള്‍ വേഗത്തില്‍ പൂര്‍ത്തിയാക്കുന്നതിന് ഈ വര്‍ഷം ജിദ്ദ വിമാനത്താവളത്തില്‍ വനിതാ കൗണ്ടറുകളുടെ എണ്ണം ഇരട്ടിയാക്കി. 208 വനിതാ കൗണ്ടറുകളാണ് ജിദ്ദ വിമാനത്താവളത്തില്‍ ഇതിനായി സജ്ജീകരിച്ചിരിക്കുന്നതെന്ന് ജവാസാത്ത് (പാസ്‌പോര്‍ട്ട് വിഭാഗം) വനിതാ വിഭാഗം സൂപ്പര്‍വൈസര്‍ ഉബൈര്‍ അല്‍സൂഫി വ്യക്തമാക്കി.യാത്ര പുറപ്പെടുന്നതിനു മന്‍പ് സ്വദേശങ്ങളിലെ വിമാനത്താവളങ്ങളില്‍ തന്നെ സഊദിയിലേക്ക് പ്രവേശനം നല്‍കുന്നതിനുള്ള മുഴുവന്‍ നടപടിക്രമങ്ങളും പൂര്‍ത്തിയാക്കുന്ന മക്ക റൂട്ട് പദ്ധതി വഴി ഇതിനകം ഒന്നര ലക്ഷത്തിലേറെ തീര്‍ഥാടകര്‍ പുണ്യഭൂമിയിലെത്തിയിട്ടുണ്ട്.
കഴിഞ്ഞ ദിവസത്തെ കണക്കുകള്‍ പ്രകാരം 1,54,453 തീര്‍ഥാടകരാണ് മക്ക റൂട്ട് പദ്ധതി വഴി എത്തിയത്. പാകിസ്താന്‍, മലേഷ്യ, ബംഗ്ലാദേശ്, ഇന്തോനേഷ്യ എന്നീ രാജ്യങ്ങളില്‍നിന്നുള്ളവരാണിവര്‍. വിമാനമിറങ്ങുന്ന തീര്‍ഥാടകരെ കാപ്പിയും മുന്തിയ ഈത്തപ്പഴവും സംസം വെള്ളവും പൂച്ചെണ്ടുകളും നല്‍കിയാണ് അധികൃതര്‍ സ്വീകരിക്കുന്നത് .വിമാനമിറങ്ങിയാലുടന്‍ മറ്റു നടപടിക്രമങ്ങള്‍ക്കൊന്നും കാത്തുനില്‍ക്കാതെ നേരെ ബസുകളില്‍ കയറി താമസസ്ഥലങ്ങളിലേക്ക് പോകാന്‍ കഴിയും.