തൃശൂര്‍:ക്വാറി വിരുദ്ധ സമരത്തിന് കോണ്‍ഗ്രസ് പൂര്‍ണ പിന്തുണ നല്‍കുമെന്ന് കെ.പി.സി.സി പ്രസിഡന്റ് വി.എം സുധീരന്‍ പറഞ്ഞു. ഒല്ലൂര്‍ മണ്ഡലത്തില്‍പ്പെട്ട വലക്കാവ് ഭാഗത്ത് അനധികൃത ക്വാറി പ്രവര്‍ത്തനങ്ങള്‍ക്ക് എതിരേ മലയോര സമിതി നടത്തിവരുന്ന രാപകല്‍ സമരപ്പന്തലിലെത്തി പിന്തുണ അറിയിച്ച ശേഷം സംസാരിക്കുകയായിരുന്നു സുധീരന്‍.
നിയമ വിരുദ്ധമായാണ് അവിടെ ക്വാറികള്‍ പ്രവര്‍ത്തിക്കുന്നതെന്ന് സമരസമിതി സുധീരനെ അറിയിച്ചു. യു.ഡി.എഫ് സര്‍ക്കാരിന്റെ കാലത്ത് വനം മന്ത്രിയായിരുന്ന തിരുവഞ്ചൂര്‍ രാധാകൃഷ്ണന്‍ ക്വാറിപ്രവര്‍ത്തനം നിര്‍ത്തിവക്കാന്‍ ഉത്തരവിട്ടിരുന്നു.
എന്നാല്‍ ഭരണം മാറിയപ്പോള്‍ ക്വാറി മാഫിയ വീണ്ടും സജീവമായെന്ന് അദ്ദേഹം പറഞ്ഞു. അഞ്ച് ദിവസമായി നിരാഹാരം കിടക്കുന്ന വനിത പ്രവര്‍ത്തക മിനിമോളെ സുധീരന്‍ സന്ദര്‍ശിച്ചു.
ഡി.സി.സി പ്രസിഡന്റ് പി.എ മാധവന്‍, കെ രാധാകൃഷ്ണന്‍,അഡ്വ. സുരേഷ് കുമാര്‍,വിജയ് ഹരി, കെ.ജി സേതുമാധവന്‍,സുനില്‍ ലാലൂര്‍, അയ്യന്തോള്‍ മണ്ഡലം പ്രസിഡന്റ് കെ രാമനാഥന്‍ എന്നിവരും സുധീരനൊപ്പം ഉണ്ടായിരുന്നു.