റോം: ഇറ്റാലിയന്‍ ക്ലബായ നാപോളിയുടെ പോളണ്ട് താരം അര്‍കാഡിയൂസ് മിലികിനെ തോക്കിന്‍മുനയില്‍ നിര്‍ത്തി കവര്‍ച്ച. കഴിഞ്ഞ ദിവസം ലിവര്‍പൂളുമായുള്ള ചാംപ്യന്‍സ് ലീഗ് മത്സരം കഴിഞ്ഞ് വീട്ടിലേക്ക് മടങ്ങുന്നതിനിടെ പുലര്‍ച്ചെ രണ്ടിനായിരുന്നു സംഭവം. സ്റ്റേഡിയത്തില്‍നിന്ന് 20 കിലോമീറ്റര്‍ അകലെയാണ് മിലിക് താമസിക്കുന്നത്. ഇവിടേക്ക് പോകുന്നതിനിടെയായിരുന്നു സംഭവം. മുഖം മറച്ച് തോക്കുധാരികളായ രണ്ട് പേര്‍ കാര്‍ തടഞ്ഞു നിര്‍ത്തി കൈയിലുള്ള റോളക്‌സ് ഡയ്‌റ്റോണയുടെ വാച്ച് ആവശ്യപ്പെടുകയായിരുന്നു. 7000 (593657.39 രൂപ) യൂറോ വിലവരുന്ന വാച്ചാണിത്. ഉടന്‍ 24 കാരനായ മിലിക് സമീപത്തുള്ള പോലിസ് സ്റ്റേഷനില്‍ പോയി സംഭവം അറിയിക്കുകയായിരുന്നു. ഫുട്‌ബോള്‍ താരങ്ങളെ കൊള്ളയടിക്കുന്നത് ഇറ്റലിയില്‍ വര്‍ധിച്ചുവരുന്നുണ്ടെന്ന് പൊലിസ് പറഞ്ഞു. 2016ല്‍ ഇറ്റാലിയന്‍ താരമായിരുന്ന ലോറന്‍സോയുടെ സ്വര്‍ണം, പണം, ആഡംബര വാച്ച് എന്നിവ കൊള്ളയടിച്ചിരുന്നു. നാലുവര്‍ഷം മുമ്പ് സ്‌ലോവാക്യന്‍ ക്യാപ്റ്റനായിരുന്ന മെറെക് ഹാംശികിനെയും തോക്കിന്‍മുനയില്‍ നിര്‍ത്തി കവര്‍ച്ച നടത്തിയിരുന്നു.