മണ്ണാര്‍ക്കാട്: പാലക്കാട് ജില്ലയില്‍ രണ്ടാമതും നിപ മരണം റിപ്പോര്‍ട്ട് ചെയ്ത സാഹചര്യത്തില്‍ വിവിധ പ്രദേശങ്ങളില്‍ കണ്ടയ്ന്‍മെന്റ് സോണുകള്‍ പ്രഖ്യാപിച്ചു. മണ്ണാര്‍ക്കാട്, കുമരംപുത്തൂര്‍ എന്നിവിടങ്ങളിലാണ് കണ്ടയ്‌മെന്റ് സോണുകളാക്കിയത്. സംസ്ഥാനത്തെ ആറ് ജില്ലകളിലെ ആശുപത്രികള്‍ക്ക് ജാഗ്രത നിര്‍ദേശവും നല്‍കിയിട്ടുണ്ട്. 

കുമരംപുത്തൂര്‍ 8,9,10,11,12,13,14 വാര്‍ഡുകളും, മണ്ണാര്‍ക്കാട് മുനിസിപ്പാലിറ്റിയിലെ 25,26,27,28 വാര്‍ഡുകളുമാണ് കണ്ടയ്ന്‍മെന്റ് സോണുകളാക്കിയത്. രോഗബാധയെ തുടര്‍ന്ന് പാലക്കാട്, മലപ്പുറം, കോഴിക്കോട്, കണ്ണൂര്‍, വയനാട്, തൃശൂര്‍ ജില്ലകളിലെ ആശുപത്രികള്‍ക്ക് പ്രത്യേക ജാഗ്രത നിര്‍ദേശവും പുറപ്പെടുവിച്ചിട്ടുണ്ട്. നിപ ലക്ഷണങ്ങള്‍ ശ്രദ്ധയില്‍പ്പെട്ടാല്‍ ഉടന്‍ റിപ്പോര്‍ട്ട് ചെയ്യണമെന്നാണ് നിര്‍ദേശം. 

നിലവില്‍ പാലക്കാട്, മലപ്പുറം ജില്ലകളിലെ ആശുപത്രികളില്‍ രോഗികള്‍ക്കൊപ്പം ഒരാളെ മാത്രമേ നില്‍ക്കാന്‍ അനുവദിക്കൂ. ഇവിടങ്ങളില്‍ അനാവശ്യ ആശുപത്രി സന്ദര്‍ശനങ്ങള്‍ ഒഴിവാക്കണമെന്നും ആരോഗ്യ വകുപ്പ് നിര്‍ദേശം നല്‍കിയിട്ടുണ്ട്. ആശുപത്രിയില്‍ എത്തുന്നവരും, ആരോഗ്യ പ്രവര്‍ത്തകരും നിര്‍ബന്ധമായും മാസ്‌ക് ധരിക്കണമെന്നും ഉത്തരവുണ്ട്. 

ALSO READ: കന്‍വാര്‍ യാത്ര കടന്നുപോകുന്ന വഴികളിലെ കടകളില്‍ ക്യൂആര്‍ കോഡുകള്‍ നിര്‍ബന്ധമാക്കി യുപി സര്‍ക്കാര്‍ 

ഇന്നലെയാണ് നിപ ബാധിച്ച് മണ്ണാര്‍ക്കാട് കുമരംപുത്തൂര്‍ ചങ്ങലീരി സ്വദേശി മരണപ്പെട്ടത്. പനി ബാധിച്ച് ചികിത്സയിലിരിക്കെയാണ് മരണം. തുടര്‍ന്ന് മഞ്ചേരി മെഡിക്കല്‍ കോളജില്‍ നടത്തിയ പ്രാഥമിക സ്രവപരിശോധനയില്‍ ഇയാള്‍ക്ക് നിപ സ്ഥിരീകരിക്കുകയായിരുന്നു. ഇയാളുടെ സമ്പര്‍ക്കപ്പട്ടികയില്‍ 46 പേര്‍ ഉള്‍പ്പെട്ടിട്ടുണ്ട്.

നിലവില്‍ മലപ്പുറം ജില്ലയില്‍ 208 പേരും, പാലക്കാട് 219 പേരും, കോഴിക്കോട് 114 പേരും, എറണാകുളത്ത് രണ്ടുപേരും നിപ സമ്പര്‍ക്കപ്പട്ടികയില്‍ ഉള്‍പ്പെട്ടിട്ടുണ്ട്. മലപ്പുറത്ത് പത്ത് പേരാണ് ആശുപത്രിയില്‍ ചികിത്സയിലുള്ളത്. ഇതില്‍ രണ്ട് പേര്‍ ഐസിയുവിലാണ് ചികിത്സയിലുള്ളതെന്നും ആരോഗ്യ വകുപ്പ് അറിയിച്ചു.

Following the second Nipah death reported in Palakkad district, containment zones have been declared in various areas to prevent the spread of the virus.