നീലേശ്വരം: ബിവറേജസ് വില്‍പനശാലക്കെതിരേ 121 ദിവസം നീണ്ടു നിന്ന ജനകീയ സമരം വിജയിച്ചു. പടന്നക്കാട് റെയില്‍വേ മേല്‍പ്പാലത്തിനു സമീപം ആരംഭിക്കാനിരുന്ന മദ്യവില്‍പനശാല ജനങ്ങളുടെ എതിര്‍പ്പിനെ തുടര്‍ന്ന് ഉപേക്ഷിച്ചു. കാഞ്ഞങ്ങാട് പ്രവര്‍ത്തിച്ചിരുന്ന ബിവറേജ് വില്‍പന ശാല പടന്നക്കാടേക്ക് മാറ്റാനാണ് ആലോചനയുണ്ടായിരുന്നത്. എന്നാല്‍ ദേശീയപാതയില്‍ നിന്ന് 500 മീറ്റര്‍ അകലെ മാത്രമേ മദ്യവില്‍പനശാല സ്ഥാപിക്കാന്‍ പാടുള്ളൂവെന്ന കോടതി വിധി കാറ്റില്‍ പറത്തിക്കൊണ്ടാണ് ഇവിടെ വില്‍പനശാല തുടങ്ങാനുള്ള ഒരുക്കങ്ങള്‍ നടക്കുന്നതെന്നു ചൂണ്ടിക്കാട്ടിയാണ് പ്രദേശവാസികള്‍ സമരത്തിനിറങ്ങിയത്.
ഓരോ ദിവസവും നൂറു കണക്കിന് സ്ത്രീകളും കുട്ടികളുമാണ് സമരപ്പന്തലില്‍ എത്തിയത്. ഇവര്‍ക്കു പിന്തുണയുമായി പുരുഷന്മാരും വിവിധ സംഘടനകളും രംഗത്തുണ്ടായിരുന്നു. മദ്യവില്‍പനശാല സ്ഥാപിക്കില്ലെന്ന് ഉറപ്പു ലഭിച്ചതോടെ സമരപ്പന്തലില്‍ ആഹ്‌ളാദം അലതല്ലി. സമരത്തില്‍ സജീവമായി സമരത്തില്‍ പങ്കെടുത്ത പി. കല്യാണിയടക്കം പത്തോളം സ്ത്രീകളെ പൊന്നാട അണിയിച്ച് ആദരിച്ചു. സമരം അവസാനിപ്പിക്കുന്നതിന്റെ ഭാഗമായി നഗരസഭാ അധ്യക്ഷന്‍ വി.വി രമേശന്‍, ഉപാധ്യക്ഷ എന്‍. സുലൈഖ , കൗണ്‍സലര്‍മാരായ അബ്ദുല്‍ റസാഖ് തായലക്കണ്ടി, രമണി, സമരസമിതി നേതാവ് ബില്‍ടെക്ക് അബ്ദുല്ല തുടങ്ങിപേര്‍ സമരപ്പന്തലിലെത്തിയിരുന്നു.പായസവിതരണവും നടന്നു.