മലയിന്‍കീഴ് : ഹോളോബ്രിക്‌സ് കയറ്റി വന്ന ലോറി തോട്ടിലേക്ക് മറിഞ്ഞ് ഡ്രൈവര്‍ക്ക് ഗുരുതര പരുക്ക്. മണിയറവിള ആളിയോട്ടുകോണം സ്വദേശി സുകുമാരനെയാണ് (64) ഗുരുതരപരിക്കുകളോടെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. അണപ്പാട് കുഴയ്ക്കാട് ഭഗവതിക്ഷേത്രത്തിലെ പുനര്‍നിര്‍മാണത്തിനുള്ള ഹോളോബ്രിക്‌സുമായി വന്ന ലോറിയാണ് മറിഞ്ഞത്. അണപ്പാട് കുഴയ്ക്കാട് ബണ്ട് റോഡിലായിരുന്നു അപകടം.
ശോചനീയാവസ്ഥയിലായിരുന്ന റോഡില്‍ കഴിഞ്ഞ ദിവസം പെയ്ത മഴയിലുണ്ടായ കുഴിയില്‍ താഴ്ന്ന ലോറി നിയന്ത്രണം വിട്ട് ഇടതുവശത്തെ തോട്ടിലേക്ക് മറിയുകയായിരുന്നു. ഡ്രൈവര്‍ മാത്രമേ വണ്ടിയിലുണ്ടായിരുന്നുള്ളൂ. ഓടിക്കൂടിയ നാട്ടുകാരാണ് ഇയാളെ ആശുപത്രിയിലെത്തിച്ചത്. മേപ്പൂക്കട ചീനിവിള റോഡുമായി ബന്ധിപ്പിക്കുന്ന കുഴയ്ക്കാട് ചീനിവിള ബണ്ട് റോഡ് തകര്‍ന്ന് സഞ്ചാരയോഗ്യമല്ലാതായിട്ട് വര്‍ഷങ്ങള്‍ കഴിഞ്ഞു. മൂന്ന് വര്‍ഷം മുമ്പ് ജില്ലാപഞ്ചായത്ത് ഫണ്ട് വിനിയോഗിച്ച് ടാറിങ് നടത്തിയിരുന്നെങ്കിലും പിന്നാലെ പെയ്ത മഴയില്‍ ടാറെല്ലാം ഇളകി കുഴികള്‍ രൂപപ്പെട്ടിരുന്നു. ഇപ്പോള്‍ റോഡിലാകെ കുഴികള്‍ മാത്രമായിട്ടുണ്ട്.