മടക്കിമല(വയനാട്): പറളിക്കുന്ന് കൊലപാതകക്കേസിലെ രണ്ടാം പ്രതിയായ ജസ്‌നയുടെ സഹോദരന്‍ ജംഷീറി (22) നെ കിണറ്റില്‍ വീണ് മരിച്ച നിലയില്‍ കണ്ടെത്തി. കഴിഞ്ഞ ദിവസം ഉച്ചയോടെയായിരുന്നു സംഭവം.
കൊലപാതകം നടന്ന വീടിന് സമീപം ആടുകളെ തീറ്റാന്‍ പോയപ്പോഴായിരുന്നു സംഭവമെന്നാണ് ബന്ധുക്കള്‍ പറയുന്നത്. ഫയര്‍ഫോഴ്‌സ് എത്തിയാണ് മൃതദേഹം പുറത്തെടുത്തത്. കൊല്ലപ്പെട്ട ലത്തീഫിന് മര്‍ദനമേറ്റ സമയം ഭിന്നശേഷിക്കാരന്‍ കൂടിയായ ജംഷീര്‍ വീട്ടിലുണ്ടായിരുന്നു. കഴിഞ്ഞ 21നാണ് കരിപ്പൂര്‍ സ്വദേശിയായ ലത്തീഫിനെ രണ്ടാം ഭാര്യയായ ജസ്‌നയുടെ വീട്ടില്‍ മരിച്ച നിലയില്‍ കണ്ടെത്തിയത്. കേസില്‍ ജസ്‌നയും ഇളയ സഹോദരന്‍ ജംഷാനും റിമാന്‍ഡിലാണ്. അതിനിടെ ജംഷീറിന്റെ മരണത്തില്‍ ദുരൂഹതയുണ്ടെന്നാരോപിച്ച് നാട്ടുകാര്‍ രംഗത്തെത്തിയിട്ടുണ്ട്. സമഗ്ര അന്വേഷണം നടത്തി യാഥാര്‍ഥ്യം പുറത്തുകൊണ്ടുവരണമെന്നാവശ്യപ്പെട്ട് ആക്ഷന്‍ കമ്മിറ്റി രൂപീകരിക്കാനാരുങ്ങുകയാണ് നാട്ടുകാര്‍.