മ്യൂണിക്ക്: എയ്ന്റര്‍റ്റ് ഫ്രാങ്ക്ഫര്‍ടിനെ ഒന്നിനെതിരേ രണ്ട് ഗോളുകള്‍ക്ക് കീഴടക്കി ബൊറൂസിയ ഡോര്‍ട്മുണ്ട് ജര്‍മന്‍ കപ്പ് സ്വന്തമാക്കി. 2012ന് ശേഷം ആദ്യമായാണ് ബൊറൂസിയ കിരീട നേട്ടത്തിലെത്തിയത്. ഒരു ഗോളിന് മുന്നില്‍ നിന്ന ശേഷം സമനില വഴങ്ങിയ ബൊറൂസിയ രണ്ടാം പകുതിയില്‍ പിയറി ഔബമേയങ് നേടിയ പെനാല്‍റ്റി ഗോളിലാണ് കിരീടമുറപ്പിച്ചത്. സീസണില്‍ ജര്‍മന്‍ ബുണ്ടസ് ലീഗയില്‍ പിന്നിലായിപ്പോയതും ചാംപ്യന്‍സ് ലീഗില്‍ കാര്യമായ മുന്നേറ്റം നടത്താന്‍ സാധിക്കാതെ വന്നതും ടീമിനെ നിരാശയിലാക്കിയിരുന്നു. അതില്‍ നിന്നുള്ള മോചനമാണ് ബൊറൂസിയക്ക് ജര്‍മന്‍ കപ്പ് നേട്ടം.
ഡെംപെലെയുടെ ഗോളില്‍ എട്ടാം മിനുട്ടില്‍ തന്നെ ലീഡെടുത്ത ബൊറൂസിയയെ 29ാം മിനുട്ടില്‍ റെബിക്കിന്റെ ഗോളില്‍ സമനിലയില്‍ പിടിക്കാന്‍ ഫ്രാങ്ക്ഫര്‍ടിന് കഴിഞ്ഞു. എന്നാല്‍ 67ാം മിനുട്ടില്‍ ലഭിച്ച പെനാല്‍റ്റി വലയിലാക്കി ഔബമേയങ് ബൊറൂസിയയുടെ വിജയവും കിരീടവും ഉറപ്പാക്കുകയായിരുന്നു. സീസണില്‍ ഔബമേയങ് വിവിധ പോരാട്ടങ്ങളില്‍ ബൊറൂസിയക്കായി നേടുന്ന 40ാം ഗോള്‍ കൂടിയായിരുന്നു ഇത്.